Kómirge kezek: Óskemende qara otyndy arzan baǵamen alýǵa ótinish qabyldaý bastaldy

ÓSKEMEN. KAZINFORM – Óskemende áleýmettik kómirge aldyn ala ótinish qabyldaý bastaldy, dep habarlaıdy Kazinform tilshisi. 

Jyl saıyn kúzdiń qazan jáne qarasha aılarynda qaladaǵy kómir tuıyqtarynda uzyn-sonar kezek qalyptasady. Sonyń aldyn alý úshin áleýmettik baǵamen satylatyn qara otyndy alýǵa ótinishti qabyldaý erte bastalyp otyr.  

Áleýmettik turǵyda osal sanattaǵy otbasylardy kómirmen ýaqtyly qamtamasyz etý úshin qala ákimdigi, «Qarajyra» kómir ken ornynyń basshylyǵy jáne «Aýǵanstan soǵysy ardagerleri men múgedekteri uıymy» qoǵamdyq birlestigi arasynda úshjaqty memorandým jasaldy. Osynyń aıasynda jer úılerde turatyn jáne qala mańyndaǵy aýyldardyń halqyna kómirdi – tonnasyna 15 700-16 200 teńge aralyǵynda satyp alýǵa múmkindik berilmek.

– Halyq qara otyndy tórt kómir tuıyǵynan ala alady. Ótinishter turǵylyqty mekenjaıy boıynsha Ortalyq aýmaqtyq basqarý bólimshelerinde qabyldanady, - dep habarlady Óskemen qalasy ákimdiginen. 

Osylaısha, kómirge ótinishti erterek berý – kúzgi sýyq bastalǵan kezde kezek pen otyn tapshylyǵynyń aldyn alady. 

Áleýmettik kómirge az qamtylǵan jáne kópbalaly otbasylar, tyl eńbekkerleri men ózge de áleýmettik sanattaǵy azamattar úmitker bola alady. Olar úshin kómir baǵasy ár tonnasyna orta eseppen 500 teńgege arzan. 

Aıta keteıik, bul joba Óskemende 2007 jyldan beri júzege asyrylyp keledi. 

Eske salsaq, Qazaqstanda kómir óndirýshilerdi qaıta óńdeýge mindetteıtini habarlanǵan bolatyn.