Kómirdi óńirlerge jóneltý protsesin jeke baqylaýda ustaımyz — Erlan Aqkenjenov
ASTANA. KAZINFORM – Energetıka mınıstrligi bastamasymen ótken alǵashqy strategııalyq keńeste qaryzdardy óteý jáne kómirdi óńirlerge úzdiksiz jetkizýdi qamtamasyz etý boıynsha mindetter qoıyldy.
Energetıka mınıstrligi kómir ónerkásibiniń máselelerin jedel basqarýǵa kiristi. Energetıka mınıstri Erlan Aqkenjenov aldaǵy jylytý maýsymyna daıyndyqqa arnalǵan alǵashqy strategııalyq keńesti ótkizdi. Keńeske iri kómir óndirýshi kásiporyndar, ýákiletti memlekettik organdar men salalyq qaýymdastyqtar qatysty.
Bul sheshim eldiń energetıkalyq qaýipsizdigin qamtamasyz etý maqsatynda shuǵyl sharalar qabyldaý qajettiligine baılanysty qabyldandy. Mınıstr Úkimet basshylyǵynyń tapsyrmasyna sáıkes kómir salasyn retteý fýnktsııalaryn Energetıka mınıstrligine zańdy túrde bekitý úderisi júrip jatqanyn atap ótti.
Keńeste shuǵyl sheshimdi talap etetin ózekti máseleler kóterildi. Sonyń ishindegi bastysy — energııa nysandarynyń kómir kásiporyndary aldyndaǵy bereshegi. Mysaly, qazirgi tańda tek «Bogatyr Komır» JShS aldyndaǵy qaryz kólemi 3 mlrd teńgege jýyq. Bul bereshekterdi óteý máselesi mınıstrliktiń qatań baqylaýynda turaqty túrde júrgiziletin bolady.
Kómir salasy elimizdegi elektr energııasynyń shamamen 70 paıyzyn óndirýdi qamtamasyz etedi jáne ónerkásiptik alyptar men turǵyn úı-kommýnaldyq sharýashylyq júıesiniń negizi bolyp tabylady. Qazaqstanda 33,6 mlrd tonna kómir qory bar, tıisinshe naryqty qamtamasyz etýde qıyndyqtar bolmaýy tıis.
— Aldaǵy jylytý maýsymynyń sátti ótýi — bizdiń basty mindetimiz. Bul eki negizgi faktorǵa baılanysty: qarjylyq tártip pen jetkizý kesteleriniń naqty oryndalýy. Biz kómir óndirýshiler aldyndaǵy bereshekterdiń ótelýin jáne kómirdi óńirlerge jóneltý protsesin jeke baqylaýda ustaımyz. Halyq pen áleýmettik nysandardy jylýmen qamtýda másele týyndamaý tıis, — dedi Energetıka mınıstri Erlan Aqkenjenov.
Keńes qorytyndysy boıynsha mınıstr birqatar naqty tapsyrma berdi. Atomdyq jáne energetıkalyq qadaǵalaý men baqylaý komıtetine ákimdiktermen birlesip óńirlerdegi kómir qorynyń jınalýyn apta saıyn baqylap otyrý jáne kómir óndirýshi kompanııalar aldyndaǵy qaryzdy májbúrlep tómendetý jumystaryn jalǵastyrý tapsyryldy.
Kómir óndirýshi kásiporyndar («Bogatyr Komır», «Qarajyra» jáne t. b.) kómir óndirý josparlaryn múltiksiz oryndap, halyq pen elektr stantsııalarynyń qajettilikteri úshin kómir jóneltýge basymdyq berýi qajet. Barlyq qatysýshy tarapqa, sonyń ishinde «QTJ» UK AQ-na, jetkizýdegi kidiristerdi boldyrmaý úshin kez kelgen logıstıkalyq máselelerdi jedel sheshýdi qamtamasyz etý júkteldi.
Energetıka mınıstrligi eldi kómirmen qamtamasyz etýge qatysty barlyq protsesterdiń tolyq úılestirýin óz moınyna alyp, kúzgi-qysqy maýsymnan senimdi ótý úshin berilgen tapsyrmalardyń oryndalýyn apta saıyn baqylaýda ustaıtyn bolady.
Aıta ketelik «Bogatyr Kómir» kompanııasy bıýdjetke 777 mln teńge salyq tólemegen.