Kómir naryǵynda deldaldarǵa tosqaýyl qoıylmaq: satý tártibi ózgere me
ASTANA. KAZINFORM — Qazaqstanda kommýnaldyq-turmystyq kómir satý tártibi ózgerýi múmkin. Básekelestikti qorǵaý agenttigi deldaldar men kóleńkeli shemalardy shektep, halyqqa kómirdi teń ári ashyq sharttarmen jetkizýge baǵyttalǵan jańa qaǵıdalardy ázirledi. Bul týraly Básekelestikti qorǵaý jáne damytý agenttigi málim etti.
Jańa tetikterdi ázirleý qajettiligi kómir ótkizý naryǵyndaǵy júıeli máselelerge baılanysty týyndady. Kóptegen jyldar boıy ónimsiz deldaldardyń jáne kóleńkeli shemalardyń bolýy otynnyń óndirýshilerden túpkilikti tutynýshylarǵa deıin jetkizilýin qıyndatyp, baǵanyń ósýine yqpal etti.
Atalǵan máselelerdi sheshý úshin Agenttik kómirdi bastapqy kóterme ótkizý naryǵyndaǵy básekelestiktiń jaı-kúıine taldaý júrgizdi. Onyń nátıjeleri boıynsha «Shubarkól Kómir» AQ jáne «Qarajyra» AQ bırjadan tys kólemdegi kommýnaldyq-turmystyq kómirge qatysty negizgi qýat ıeleri bolyp aıqyndaldy.
Atalǵan kólemderge teń qoljetimdilikti qamtamasyz etý maqsatynda Agenttik negizgi qýatqa — kommýnaldyq-turmystyq kómirge teń qol jetkizý qaǵıdalaryn ázirledi.
Qaǵıdalarda kózdelgen tetik kómirdi jer qoınaýyn paıdalanýshynyń tsıfrlyq júıesi arqyly ótkizýdi qarastyrady. Bul kólemderdi bólýdiń ashyqtyǵyn arttyrýǵa jáne naryqqa qatysýshylar úshin biryńǵaı qoljetimdilik sharttaryn qamtamasyz etýge múmkindik beredi.
Jańa tártipti engizý jetkizý tizbeginen ónimsiz deldaldardy alyp tastaýǵa, baǵa belgileýdiń ashyqtyǵyn arttyrýǵa jáne túpkilikti tutynýshylar úshin kómir baǵasynyń negizsiz ósý táýekelderin tómendetýge baǵyttalǵan.
Atalǵan sharalardy iske asyrý kommýnaldyq-turmystyq kómir naryǵynyń neǵurlym ashyq jumys isteýine jáne halyqtyń ekonomıkalyq múddelerin qorǵaýǵa yqpal etedi.
Aıta keteıik, elde kómir tasymaly 9 aıda 77,8 mln tonnaǵa jetti.
