Kómir qoımalaryndaǵy otyn kólemin JI arqyly esepteý júıesi engiziledi
ASTANA. KAZINFORM – Bul týraly «Samuryq-Energo» aktsıonerlik qoǵamynyń basqarma tóraǵasy Qaırat Maqsutov Úkimet otyrysynda málim etti.
- Samuryq-Energo kúndelikti aero-túsirilim jasaıtyn drondardy qoldana otyryp, elektr stantsııasy qoımalarynda kómirdi esepke alý protsesin avtomattandyrýdy josparlap otyr. Qazirgi kezde kómir qaldyqtaryn esepteý aspaptar arqyly qolmen júrgiziledi.
Al tsıfrlyq júıede jasandy ıntellekt pen kompıýterdi qoldaný arqyly derekter óńdeledi. Alynǵan derekterdi kásiporynnyń esepke alý júıesimen odan ári biriktirý kómir qaldyqtary týraly kúndelikti eseptilik qalyptastyrady, - dedi kompanııa basshysy.
Aıtýynsha, bul esepter Energetıka mınıstrligine berilip otyrady.
- Osynyń arqasynda ólsheý ýaqyty 5 kúnnen 2 saǵatqa deıin qysqaryp, esepke alý dáldigi 99%-ǵa deıin artady. Osylaısha kómir qoımasynyń úsh ólshemdi modeli qurylady, - dedi Qaırat Maqsutov.
Aıta keteıik, búgingi Úkimet otyrysynda elektr energetıkasy salasyn damytý men tsıfrlandyrý barysy talqylanyp jatyr.