Kómir generatsııasy: 49 paıyzdyq ósim múmkin be

PAVLODAR. KAZINFORM — Elde óndiriletin elektr qýatynyń shamamen 40 paıyzy Pavlodar óńirine tıesili. Jaqyn jyldary bul kórsetkishti 49%-ǵa jetkizý josparlanyp otyr.

Búginde oblystaǵy energııa kózderiniń jıyntyq qýaty — 8542 MVt. Negizgi salmaqty B. Nurjanov atyndaǵy Ekibastuz MAES-1 stansasy (4040 MVt) men Ekibastuz MAES-2 stansasy (1000 MVt) kóterip otyr. Sondaı-aq Aqsýdaǵy Eýroazııalyq energetıkalyq korporatsııa stansasy (2475 MVt) — aımaq energetıkasynyń mańyzdy býyny. Ótken jyly óńir 49,1 mlrd kVt/saǵ elektr energııasyn óndirdi. Bul — respýblıka boıynsha asa qomaqty úles. Pavlodar tek tutynýshy emes, eldiń ındýstrııalyq beldeýin jaryqpen jáne jylýmen qamtyp otyrǵan negizgi donor aımaq. 

— Aldaǵy jyldary júzege asýy tıis jobalar aýqymy erekshe. Eń irisi — Ekibastuz MAES-3 stansasynyń qurylysy. Joba boıynsha árqaısysy 660 MVt bolatyn tórt energııa blogy ornatylyp, jalpy qýat 2640 MVt-qa jetpek. Budan bólek, MAES-2-de № 3 jáne № 4 bloktar (árqaısysy 550 MVt) salynady. Eger barlyq jospar tolyq oryndalsa, óńirdegi elektr qýatynyń óndirisi 8542 MVt-tan 12717 MVt-qa deıin ulǵaıady. Ósim — 49 paıyz. Bul Pavlodardyń eldegi elektr óndirisindegi úlesin is júzinde 50 paıyzǵa jaqyndatýy múmkin, — dep habarlady Kazinform tilshisine Pavlodar oblysy ákiminiń baspasóz qyzmetinen.

Biraq bul jerde mynadaı zańdy saýal týyndaıdy: ishki naryqtaǵy suranys pen eksporttyq áleýet bul kólemdi tolyq ıgere ala ma? Qazirgi tańda Qazaqstanda elektr tutyný birkelki emes.

Soltústik artyq óndirse, ońtústik tapshylyq kóredi. Demek, jańa qýat tek óndiris kólemin arttyrý emes, energııa aǵynyn tıimdi basqarýdy da talap etedi.

Jergilikti qýat óndiretin alyp nysandardyń barlyǵy búginde kómirdi paıdalanyp otyrǵany belgili.

Al atalǵan jerasty baılyǵyna Ertistiń Pavlodar óńiri asa baı. Kómir óndirýshi kásiporyndardyń óndiristik qýaty shamamen — 80 mln tonna. Onyń ishinde KSN markaly tas kómir — 70 mln tonna, 3B markaly qońyr kómir — 9 mln tonna, T markaly tas kómir — 600 myń tonna. 

Ónerkásiptiń jalpy kólemindegi taý-ken sektorynyń úlesi 24,9 paıyz bolsa, taý-ken óndirisi sektorynyń úshten biri kómir óndirisine tıesili. Al elimizde óndiriletin kómirdiń 60%-y Pavlodar jerinen shyǵatynyn ekiniń biri bile bermeıtini anyq. Byltyr oblysta kómir óndirisi 3,8% paıyzǵa artyp, óndiris kólemi 298,4 mlrd teńge. 

Bul salada Ekibastuzdaǵy «Bogatyr Kómir» JShS, «EEK» AQ-nyń «Shyǵys» kenishi, «Angrensor-Energo» JShS, sondaı-aq Baıanaýyl aýdanyndaǵy Maıkóbe kómir basseınindegi qońyr kómir (lıgnıt) óndiretin «Gamma Sarykól» JShS men «Maıkóben-Vest» JShS tanymal. Bulardyń ishinde «Bogatyr Kómir» men «Shyǵys» kenishi óńirdegi barlyq kómirdiń 80 paıyzyn berip otyr. Kómir óndirý salasynda búginde 15 myńnan astam adam «eki qolǵa — bir kúrek» tapqan.

Eske sala keteıik, elde kómir óndirisin arttyrý boıynsha iri kompanııalar josparlaryn jarııalady.