Kómir, gaz álde JEK: Qazaqstan elektr qýatyn óndirýde qaı salaǵa arqa súıep otyr
ASTANA. KAZINFORM — Energetıka mınıstrligi eldiń energııa teńgerimi týraly málimet jarııalady.
— Energetıka mınıstrligi elektr energııasyn óndirýdiń túrli kózderin teńgerimdi damytýǵa erekshe nazar aýdaryp keledi. Búginde eldegi elektr energııasyn óndirýdiń negizin kómir generatsııasy quraıdy. Onyń úlesi jalpy elektr energııasy óndirisiniń 62,1%-na teń, — delingen mınıstrlik habarlamasynda.
Eldiń energııa teńgerimine gaz generatsııasy da eleýli úles qosýda. Qazirgi tańda gaz elektr stantsııalarynyń úlesine elektr energııasy óndirisiniń 23,4%-y tıesili.
Іri sý elektr stantsııalarynyń (shaǵyn GES-terdi qospaǵanda) úlesi 7,5%-dy quraıdy. Olar ekologııalyq taza elektr energııasyn óndirýmen qatar, energııa júıesiniń turaqty jumysyn qamtamasyz etýge mańyzdy úles qosady.
Jańartylatyn energııa kózderi de turaqty ósim kórsetip keledi. Qazir JEK obektileriniń jalpy generatsııadaǵy úlesi 7%-ǵa jetti.
Vedomstvo atap ótkendeı, osylaısha, Qazaqstannyń energetıka salasy energııamen jabdyqtaýdyń senimdiligin saqtaı otyryp, generatsııa kózderin ártaraptandyrý baǵyty boıynsha damyp keledi. Qoldanystaǵy qýattardy jańǵyrtý jáne jańa energetıkalyq nysandar salýmen qatar, jańartylatyn energetıkany, gaz generatsııasyn jáne gıdroenergetıkany damytý jumystary jalǵasady. Bul óz kezeginde elimizdiń energetıkalyq qaýipsizdigin nyǵaıtýǵa yqpal etedi.
Buǵan deıin Qazaqstan energııa tapshylyǵyn joıý úshin kómir generatsııasyn damytyp, «taza kómir» tehnologııasyn engizýge den qoıyp otyrǵanyn jazǵan edik.
