Kómir elektr stantsııalarynan zııandy gaz bólinýi 34%-ǵa deıin qysqarady

ASTANA. KAZINFORM – Qazaqstanda kómir generatsııasyn damytý jónindegi ulttyq joba aıasynda jańa elektr stantsııalaryn salý jáne qoldanystaǵy nysandardy jańǵyrtý josparlanyp otyr, dep jazdy Energetıka mınıstrligi.

Joba qorshaǵan ortaǵa áserdi azaıtýǵa baǵyttalǵan «taza kómir» tehnologııalaryn engizýdi kózdeıdi. Atap aıtqanda, jańa stantsııalar bý men temperatýranyń asa joǵary krıtıkalyq parametrlerinde jumys isteıdi. Bul elektr energııasyn óndirý tıimdiligin 5–6%-ǵa arttyryp, kómir shyǵynyn azaıtýǵa jáne zııandy shyǵaryndylardy tómendetýge múmkindik beredi.

– Ulttyq joba aıasynda jańa elektr stantsııalaryn salý jáne qoldanystaǵy stantsııalardy zamanaýı ekologııalyq sheshimder negizinde jańǵyrtý kózdelgen. Tútin gazdaryn tazartýǵa arnalǵan zamanaýı jabdyqtar, onyń ishinde elektrofıltrler, qap súzgiler, selektıvti katalıtıkalyq qalpyna keltirý júıeleri jáne desýlfýratsııa qondyrǵylary ornatylady, – delingen málimette.

Sonymen qatar qoldanystaǵy kómir elektr stantsııalaryn kezeń-kezeńimen jańǵyrtý josparlanǵan. Bul rette eń ozyq qoljetimdi tehnologııalardy engizýge basymdyq beriledi.

Ulttyq jobany iske asyrý nátıjesinde kómir elektr stantsııalarynan zııandy zattardyń shyǵarylýy 34%-ǵa qysqaryp, negizgi generatsııalaıtyn jabdyqtardyń tozý deńgeıi tómendeıdi jáne energııa júıesiniń senimdiligi artady.

Aıta keteıik, Pavlodarda óndiristik naqty shyǵaryndylardyń kólemi 60 myń tonnaǵa azaıǵan.