Kómir elektr stantsııalaryna zamanaýı tazartý júıelerin kezeń-kezeńmen engizý qajet — Úkimet basshysy
ASTANA. KAZINFORM — Energetıka mınıstrligi kómir óndirý tıimdiligin arttyrý jáne qaýipsiz eńbek jaǵdaılaryn qamtamasyz etý boıynsha is-sharalar josparyn ázirlep, bekitýi tıis. Búgin Úkimet otyrysynda Premer-mınıstr Oljas Bektenov atalǵan vedomstvoǵa osyndaı tapsyrma berdi.
— Energetıka mınıstrligi Ekologııa mınıstrligimen birge bir aı ishinde qoldanystaǵy energııa kózderine taldaý júrgizip, árbir stantsııa boıynsha «taza kómirge» negizdelgen zamanaýı ekologııalyq tehnologııalardy engizýge baılanysty jol kartasyn ázirlep, bekitsin. Qoldanystaǵy kómir elektr stantsııalarynda zamanaýı tazartý júıelerin, onyń ishinde elektrofıltrlerdi qoldana otyryp, kezeń-kezeńmen engizýdi qamtamasyz etý qajet. Tazartý júıeleriniń tıimdiligin arttyrý jáne halyqaralyq tájirıbeni Qazaqstan jaǵdaıyna beıimdeý boıynsha zertteý jumystaryn jandandyrý kerek, — dedi Úkimet basshysy.
Onyń paıymynsha, Qazaqstanda kómir hımııasy salasynyń áleýeti joǵary bolǵanymen áli de qalyptasý ústinde. Kómirden qosylǵan quny joǵary ónim alý ekonomıkany ártaraptandyryp, eksporttyq áleýetti nyǵaıtýǵa belsendi yqpal etedi.
— Osyǵan baılanysty Energetıka mınıstrligi 1 shildege deıin kómir hımııasy salasyn keshendi memlekettik qoldaý sharalaryn, sondaı-aq «Báıterek» holdıngimen birge kómir hımııasy jobalaryn qarjylandyrýdyń naqty tetikterin ázirlesin, — dedi Oljas Bektenov.
Premer-mınıstr kómirdi ashyq ádispen óndirý dástúrli tehnologııalar negizinde, kóbinese eskirgen jabdyqtardy paıdalana otyryp júzege asyrylatynan nazar aýdartty.
— Bul kómir ken oryndaryn ıgerý tıimdiligine ǵana emes, sonymen qatar jumyskerlerdiń qaýipsizdigine de áserin tıgizedi. Osyǵan baılanysty Energetıka mınıstrligi kómir ónerkásibi kásiporyndarymen birge tsıfrlyq tehnologııalardy paıdalana otyryp, bir aı ishinde kómir óndirý tıimdiligin arttyrý jáne qaýipsiz eńbek jaǵdaılaryn qamtamasyz etý boıynsha is-sharalar josparyn ázirlep, bekitýge tıis, — dedi ol.
Aıta keteıik, Pavlodar men Qaraǵandyda kómirden dızel óndiretin jobalar iske asyrylady.
