Kómir baǵasynyń turaqty bolýyn baqylaý kerek — Premer-mınıstr

ASTANA. KAZINFORM — Jylytý maýsymynda kommýnaldyq qyzmetterdi jóndeý brıgadalary kez kelgen jaǵdaıǵa shuǵyl áreket etýi tıis. Premer-mınıstr Oljas Bektenov jylytý maýsymyna daıyndyq sharalary boıynsha tapsyrmalar berdi.

— Búginde óńirlerdiń basym bóliginde jylý berý maýsymy ýaqytyly bastaldy. Respýblıkanyń ońtústiginde jylý bekitilgen kestege sáıkes jáne aýa raıyna baılanysty beriledi. Óńir ákimderine jylý berý maýsymyn tikeleı baqylaýda alýdy tapsyramyn, — dedi O. Bektenov Úkimettiń búgingi otyrysynda.

Premer-mınıstr jylý kózderindegi barlyq josparly parametrlerdiń saqtalýyn, otynnyń normatıvtik qoryn qadaǵalap otyrýdy tapsyrdy.

— Rezervtik jabdyqtardyń ázirligin qamtamasyz etińizder. Kommýnaldyq qyzmetterdi jóndeý brıgadalary kez kelgen jaǵdaıǵa shuǵyl áreket etýi tıis. Sondaı-aq halyqqa arnalǵan kómir baǵasynyń turaqty bolýyn da baqylaýda ustaý qajet, — dedi Úkimet basshysy.

Aıta keteıik, elimizdiń 11 óńirinde jylytý maýsymy bastaldy. 1 qarashaǵa deıin qalǵan óńirlerde jylýmen jabdyqtaýdy bastaý josparlanǵan.

Petropavlda keı úılerge jylý berý keshiktirilip jatyr.

Búgin Aqtaýda jylý berý maýsymy bastalady.