Kompıýterler men elektrondyq jabdyqtardyń óndiris kólemi 74,3%-ǵa ósti

ASTANA. KAZINFORM – 2025 jyldyń alǵashqy bes aıynda kompıýterler, elektrondyq jáne optıkalyq qural-jabdyqtar óndirisiniń kólemi ótken jyldyń sáıkes kezeńimen salystyrǵanda 74,3%-ǵa ósip, 41,7 mlrd teńgeden asty (ótken jyldyń osy kezeńinde bul kórsetkish 30 mlrd teńgeden az bolǵan). 

Naqty mánde óndiris kólemi 89%-ǵa ulǵaıdy (óndiris kóleminiń naqty ındeksi — 189,3%). Bul týraly «QazIndustry» AQ Mashına jasaý ónerkásibin damytý dırektsııasy habarlady.

— Óndiristiń artýy salaǵa baǵyttalǵan ınvestıtsııanyń kúrt ósýimen tikeleı baılanysty. 2025 jyldyń alǵashqy bes aıynda kompıýterler, elektrondyq jáne optıkalyq qural-jabdyqtar óndirisine salynǵan ınvestıtsııa kólemi shamamen 2,3 mlrd teńgege jetti. Ósim 2 mlrd teńgeden asyp, bul kórsetkish 2024 jyldyń sáıkes kezeńinen 9 ese joǵary bolyp otyr, — delingen habarlamada.

Eń úlken ósim elektrondyq turmystyq tehnıka óndirisinde — 68 eseden astam (95,9 mln teńgeden 6,5 mlrd teńgege deıin) jáne elektrondyq elementter óndirisinde — 15 eseden astam (65,3 mln teńgeden 1 mlrd teńgege deıin) baıqalady.

Bıyl Qaraǵandy oblysynyń Saran qalasynda Samsung brendimen teledıdarlar men basqa da tehnıkalardy shyǵaratyn «Silk Road Electronics» JShS jobasyn iske qosý josparlanyp otyr.

2025 jyldyń qańtar–sáýir aılarynda naqty mándegi kórsetkish boıynsha birqatar ónim túrleriniń óndirisi aıtarlyqtaı artqan. Atap aıtqanda, dybys nemese beıneni jazýǵa jáne oınatýǵa arnalǵan qurylǵylarmen biriktirilgen túrli-tústi teledıdar qabyldaǵyshtarynyń óndirisi 7 ese ósken. Sonymen qatar, ózge de jartylaı ótkizgish quraldar (fotosezimtal aspaptardan basqa) óndirisi 10 ese artqan. 

Aıta ketelik Qyzylordada santehnıka shyǵaratyn jańa zaýyt salýǵa €70 mln tartylatyny týraly jazǵan edik.