«Kompozıtor» fılminiń ujymy Astanadaǵy Qytaı kınofestıvaline keldi
ASTANA. QazAqparat - Búgin Astana qalasyndaǵy Qytaı kınofestıvaliniń saltanatty ashylý rásiminde Djekı Chan Qazaqstan men Qytaı birlesip túsiretin «Kompozıtor» fılminiń ujymymen kezdesti, dep habarlaıdy QazAqparat.
Ashylý saltanatynda sóz sóılegen Djekı Chan «Qazaqstan men Qytaı birlesip túsiretin «Kompozıtor» fılminiń ujymymen kezdestim, kelesi rette Qazaqstanda túsiriletin týyndy meniki bolady dep senemin», - dedi.
Eske sala keteıik, Sh.Aımanov atyndaǵy «Qazaqfılm» kınostýdııasy Qytaı kınematografısterimen birlesip «Kompozıtor» (jumys ataýy) atty fılmdi túsirýdi qolǵa aldy .
Atalǵan fılm álemdik ónerge eleýli úles qosqan Qytaıdyń tanymal kompozıtory Sı Sınhaıdyń ómiri men óner jolyna arnalmaq. Ekinshi dúnıejúzilik soǵys jyldarynda (1941-1943 jyldar aralyǵynda) kompozıtor Qazaqstanda turyp, qazaqtyń talantty kompozıtory Baqytjan Baıqadamovpen dos bolǵan. Kartına eki el arasyndaǵy yntymaqtastyq pen kompozıtorlardyń dostyǵy týraly syr shertedi.
Budan buryn habarlaǵandaı, búgin Astanada ótken baspasóz máslıhatynda Djekı Chan Qazaqstanda fılim túsirýge nıetti ekendigin málimdegen bolatyn.
