«Kompozıtor» fılmi Beıjiń halyqaralyq kınofestıvaline qatysady
Atalǵan festıval 13-20 sáýir aralyǵynda Qytaı astanasynda ótedi. QHR negizi qalanýynyń 70-jyl tolýyna oraı kınofestıvaldiń bıylǵy taqyryby - «Otan» dep atalady.
Kórkem lenta qytaılyq kompozıtor Sı Sınhaıdyń Keńes odaǵy kezinde Almatyǵa evakýatsııalanǵan kezi jáne onyń qazaq kompozıtory Baqytjan Baıqadamovpen dostyǵy týraly baıandaıdy. Fılmdi Sh.Aımanov atyndaǵy «Qazaqfılm» kınostýdııasy jáne qytaılyq «Shineworks Pictures», «China film coproduction corporation» kompanııalary túsirgen.
Baqytjan Baıqadamovtyń obrazyn tanymal qazaqstandyq akter Berik Aıtjanov somdaǵan. Al Sı Sınhaıdy qytaılyq akter Hý Chjýn oınaıdy. Sonymen qatar, kartınada basqa da otandyq akterler boı kórsetedi - Altynaı Nógerbek, Arýjan Jazylbekova, Sergeı Ýfımtsev jáne basqalar. Qoıýshy rejısseri - Sherzat ıAkýb, so-rejısseri - Sábıt Qurmanbekov.
«Kompozıtor» fılmi Beıjiń kınofestıvalinde basty júldege - Tiantan («Aspan ǵıbadathanasy») syılyǵyna iriktelip alynǵan álemniń 14 fılmmen qatar baq synaıdy.
Tiantan Award júldesiniń Halyqaralyq qazylar alqasy tanymal kınematografısterden quralǵan. Olar júldelerdi on nomınatsııa - úzdik kórkem fılm, úzdik rejıssýra, akterlik sheberlik(sonymen qatar ekinshi plandaǵy akter), úzdik stsenarıı, úzdik mýzyka jáne vızýaldy effektiler boıynsha tabystaıdy. Qazylar alqasyna «Arystan patsha» anımatsııalyq fılmi boıynsha tanylǵan, amerıkalyq rejısser jáne prodıýser Rob Mınkoff tóraǵalyq etetin bolady.
Beıjiń qalasy ákimshiliginiń qoldaýymen Beıjiń halyqaralyq kınofestıvali jyl saıyn 2011 jyldan bastap ótip keledi. Tiantan Award-2019 premııasynyń jeńimpazdary 2019 jyldyń 20 sáýir kúni kınofestıvaldiń jabylý saltanatynda belgili bolady.
Esterińizge sala keteıik, «Kompozıtor» fılminiń óndirisi úkimet deńgeıinde uıymdastyrylǵan bolatyn. 2015 jyly 31 tamyzda QR Tuńǵysh Prezıdenti - Elbasy Nursultan Nazarbaev jáne Qytaı Halyq Respýblıkasynyń Tóraǵasy Sı Tszınpınniń qatysýymen ótken mádenı-gýmanıtarlyq yntymaqtastyq týraly kelisimge qol qoıylǵan kezde ýaǵdalastyq etilgen. QR Mádenıet jáne sport mınıstrliginiń usynysy boıynsha Sh.Aımanov atyndaǵy «Qazaqfılm» AQ men qytaılyq Shineworks Pictures kompanııasy arasynda atalǵan fılmdi birlese óndirý, qarjylandyrý, jáne paıdalaný jóninde kelisimge otyrǵan.
2017 jyly 8 maýsymda QHR Tóraǵasy Sı Tszınpınniń Qazaqstanǵa jasaǵan sapary aıasynda qol qoıylǵan birlesip kınoóndiristi júrgizý týraly memleketaralyq kelisim negizinde atalǵan kınojoba iske asqan bolatyn.
Kartınanyń túsirilimderi 2017 jyly ótip, fılmniń biraz bóligi Qazaqstanda júrgizildi.