Kompozıtor Arman Qaınazarovtyń ólimine qatysy bar kúdikti ustaldy
Ánshi, kompozıtor Arman Qaınazarovtyń ólimine qatysy bar kúdikti ustaldy, dep habarlaıdy QazAqparat tilshisi.
Almaty qalalyq polıtsııa departamenti atalǵan derek Alataý aýdandyq polıtsııa basqarmasyna tirkelip, QR QK 106-baby 3-bóligi boıynsha tergeý júrgizilip jatqanyn málimdedi.
«Atalǵan qylmysty jasady degen kúdikti izin sýytpaı ustaldy. Ol qamaýǵa alyndy. Oqıǵanyń basqa da mán-jaıy anyqtalyp jatyr», - dep habarlady Almaty qalalyq polıtsııa departamentiniń baspasóz qyzmeti.
Buǵan deıin buqaralyq aqparat quraldarynda kompozıtordyń 4 qyrkúıekte «Shańyraq» shaǵynaýdanyndaǵy kafe mańynda jigittermen tóbelesip, sol kúni jansaqtaý bólimine túskeni týraly aqparat taraǵan bolatyn.
Keıin onyń komaǵa túsip, 19 qyrkúıekte qaıtys bolǵany habarlandy.
Eske salaıyq, osy jyldyń maýsym aıynda áleýmettik jelide onyń aıanyshty jaǵdaıdaǵy vıdeosy taraǵan bolatyn.
