«Kompetenz» saqtandyrý kompanııasynyń taza paıdasy 41 paıyzǵa ósti
ALMATY. 14 mamyr. QazAqparat - Qazaqstandyq «Kompetenz» saqtandyrý kompanııasy AQ naryqtaǵy belsendi damý úrdisin jalǵastyrýǵa úmitti.
Kompanııa basshylyǵy búgin Almatyda 2011 jylǵy qarjylyq esebiniń qorytyndysyn jarııalaý kezinde osylaı málim etti.
Qazaqstan naryǵynda 3 mamyrǵa deıin «Allianz Kazakhstan» degen atpen jumys istep kelgen saqtandyrý kompanııasynyń 100 paıyz aktsııasyn 2011 jyly Alianz SE nemis konserninen Janar Qalıeva satyp alǵan bolatyn. Odan keıin bul kompanııanyń kórsetkishteri tómendeıdi dep boljam jasaýshylar kóbeıgen edi. Alaıda qazaqstandyqtar eshkimniń kómeginsiz óz kúshimen de jumys jasaı alatynyn dáleldedi. Dırektor keńesiniń tóraıymy J.Qalıevanyń aıtýynsha, Allianz brendiniń qymbattyǵyna baılanysty óz ataýyn ózgertken taza qazaqstandyq saqtandyrý kompanııasy naryqtaǵy belsendi qyzmetin odan ary jalǵastyrýda. «PWC halyqaralyq aýdıtorlyq kompanııasynyń aýdıttik eseptemesine sáıkes 2011 jyly jınaqtalǵan syıaqylardyń jıyntyq kólemi 3,9 mıllıard teńgeni qurady. Taza paıda 41 paıyzǵa joǵarylap, 172-den 243 mıllıon teńgege deıin ósti. Menshikti kapıtal 29 paıyzǵa artyp, 2 mıllıard 277 mıllıon teńgeni, al jarǵylyq kapıtal 11 paıyzǵa ósip, 2 mıllıard 612 teńgeni qurady», - deıdi Janar Qalıeva.
