Kompanııany taratý barysynda quryltaıshyǵa qandaı jaýapkershilik júkteledi

ASTANA. KAZINFORM — Memlekettik kirister komıteti Memlekettik qyzmetter basqarmasynyń basshysy Dýman Qanseıitov kompanııany taratý barysynda quryltaıshyǵa qandaı jaýapkershilik júkteletinin aıtty. 

Aıta keteıik, osy jyldyń qazan aıynda qarjy mınıstriniń «Salyq tóleýshilerdiń qyzmetin taratý, qaıta uıymdastyrý jáne toqtatý kezinde salyqtyq mindettemeni oryndaýdyń keıbir máseleleri týraly» № 654 buıryǵy shyqqan bolatyn. Osyǵan baılanysty qoǵamda taratylatyn kompanııanyń salyq bereshegin quryltaıshy esebinen jabý normasy alańdaýshylyq týdyrǵan edi. Alaıda, Dýman Qanseıitovtiń aıtýynsha, atalǵan buıryq qoldanystaǵy zańdy buzbaıdy ári quryltaıshylar úshin jańa mindettemeler engizbeıdi. Qujat tek qana normanyń oryndalý tártibin aıqyndaıdy.

— Bul buıryq jańadan eshteńe engizbeıdi. Buıryq 2026 jyldyń 1 qańtarynan bastap kúshine enetin Salyq kodeksiniń normalaryn júzege asyrý úshin qabyldanǵan. Ol kompanııa qyzmetin taratqanda nemese toqtatqanda salyq mindettemesin qalaı oryndaýy tıistigine qatysty tártipti sıpattaıdy, — dedi ol.

Onyń túsindirýinshe, negizgi qaǵıda ózgerissiz qalady. Eger kompanııanyń salyqtyq qaryzy bolsa, onda ol salyq kodeksinde kózdelgen tártippen óndiriledi.

— Eger kompanııa múlki jetkilisiz bolsa, onda quryltaıshy jaýapkershiligi Qazaqstan zańnamasynda tikeleı qarastyrylǵan jekelegen jaǵdaıda ǵana týyndaıdy. Bul ereje zańnamada — Salyq, Azamattyq kodeksterde, «Ońlatý jáne bankrottyq týraly» zańda buryn da bolǵan. Joǵaryda atalǵan buıryq memlekettik kirister organdarynyń quziretin keńeıtpeı osy normalardy qaıtalaıdy. Merdiger naqty jaǵdaıda kompanııa bankrot dep tanylǵannan keıin ǵana yntymaqty jaýapkershilikke tartylýy múmkin. Máselen, kompanııa qasqaqana bankrottyq jaǵdaıǵa jetkizgende, múlikti shyǵarǵanda nemese jasyrǵanda, — dep túsindiredi Dýman Qanseıitov.