Kompanııamyzdyń ónimi Qysqy Azıadanyń aqparattyq qaýipsizdigin senimdi qamtamasyz etetin bolady - «Doktor Veb» kompanııasynyń Bas dırektory
ALMATY. Qyrkúıektiń 21-i. QazAqparat /Erbol Turymbetov/ - 2011 jylǵy 7-qysqy Azııa oıyndarynyń aqparattyq qaýipsizdigi jónindegi resmı seriktesi - Dr.Web markaly aqparattyq qaýipsizdik quraldarynyń reseılik ázirleýshisi «Doktor Veb» kompanııasy ekendigi anyqtaldy.
Ekijaqty kelisim nátıjesinde, 2011 jylǵy Qysqy Azııa oıyndarynyń jarystaryn qamtamasyz etetin elektrondyq tablo, jaryqtyq anımatsııa, tóreshiler komıssııasy sheshimderiniń nátıjeleri, meteoaspaptar men sandyq tehnıka Dr.Web-tiń qorǵaýynda bolady.
«Doktor Veb» - Qazaqstanda kóp jyldardan beri tabysty qyzmet etip, senimdi aqtap kele jatqan kompanııa. Búginde «Qazaqtelekom» sııaqty alpaýyt kompanııanyń ózi aqparattyq qaýipsizdigin qamtamasyz etýde osy kompanııaǵa senim artady. Biz de «Doktor Veb» kompanııasymen seriktese otyryp, Qysqy Azıada barysyndaǵy aqparattyq qaýipsizdik jóninen senimdi bolatynymyzdy aıtqym keledi», dedi «2011 jylǵy Qysqy Azııa oıyndaryn uıymdastyrý komıtetiniń atqarýshy dırektsııasy» AQ vıtse-prezıdenti Maǵjan Qanǵojın.
«Doktor Veb» kompanııasynyń Bas dırektory Borıs Sharov kompanııaǵa Azıadanyń resmı seriktesi bolý úlken mártebe ekenin atap ótti. «Ótkizilgeli otyrǵan aıtýly doda barysynda kez kelgen sportshy, qazylar alqasy nemese jýrnalıster ózderiniń dıskilerin, fleshkalaryn paıdalanatyny anyq. Biraq, sol arqyly vırýstyq qaýipter tóndirýi múmkin. Bizdiń kompanııamyzdyń ónimi bul jaǵdaıda sapaly qyzmeti arqyly aqparattyq qaýipsizdikti turaqty, senimdi qamtamasyz etetin bolady», dedi ol.
