Kompanııalar arasynda ádil báseke bolýyn qamtamasyz etetin júıe kerek - Toqaev
ATYRAÝ OBLYSY. QazAqparat - Memleket basshysy Qasym-Jomart Toqaev Atyraý oblysy jurtshylyǵymen kezdesýinde barlyq kompanııalar arasynda ádil jáne adal báseke bolýy kerektigin aıtty. Bul týraly QazAqparat QR Prezıdentiniń baspasóz hatshysy Berik Ýálıge silteme jasap habarlaıdy.
«Jergilikti ónim óndirýshiler úshin teń quqyly jaǵdaı jasaý. Qazir salyq jáne basqa da bıýdjettik tólemder boıynsha tek sheteldik jetkizýshilerge jeńildik bar.
Sonyń kesirinen, bizdiń kásipkerler baıqaýǵa qatysýǵa áreket te jasamaıdy, sebebi, odan esh paıda joq ekenin biledi. Import ónimi báribir arzanǵa túsedi», - dedi Qasym-Jomart Toqaev Atyraý oblysy jurtshylyǵymen kezdesýinde.
Sondaı-aq, ol bul máseleni júıeli sheshý qajettigi týraly aıtty.
«Bul - bizdiń júıeli máselemiz, ony Úkimet jedel túrde sheship, jaǵdaıdy ózgertýi tıis.
Barlyq kompanııalar arasynda ádil jáne adal báseke bolýyn qamtamasyz etetin naqty, aıqyn júıe jasaý kerek. Bul bárine paıdaly bolady», - dedi Q.Toqaev.
Eske sala ketsek, keshe Qasym-Jomart Toqaev Atyraý oblysyna jumys saparymen kelgendigi týraly habarlaǵan bolatynbyz.
