Kompanııadan qomaqty qarjy jymqyrǵan qazaqstandyq Dýbaıda ustaldy
ASTANA. KAZINFORM — 2022 jyly Almaty qalasyndaǵy jeke menshik kompanııalardyń birinen 947 mıllıon teńge jymqyrǵan kúdikti Dýbaıda boı taslap júrgen jerinen qolǵa tústi. Bul týraly QR ІІM málim etti.
— Dýbaıda Qazaqstan ІІM Interpol Ulttyq ortalyq bıýrosynyń suraýy boıynsha Qylmystyq kodekstiń 189-babynda kózdelgen qylmysty jasaǵany úshin (Asa iri mólsherde senip tapsyrylǵan bóten múlikti ıemdenip alý nemese talan-tarajǵa salý) halyqaralyq izdeýge jarııalanǵan er adam ustaldy. 2022 jyly kúdikti adamdar tobymen almatylyq JShS-lerdiń birinen ózine qarasty kompanııanyń shotyna qarajat aýdarý arqyly 947 mıllıon teńge jymqyrǵan, — delingen habarlamada.
Qazirgi ýaqytta er adam qamaýda. Ony ekstradıtsııalaý máselesi sheshilip jatyr.
Eske sala keteıik, buǵan deıin adam ólimine qatysty qylmysqa kúdikti Reseıden ekstradıtsııalanǵanyn jazǵan bolatynbyz.