Kompanııa tolyǵymen sheteldikterdiń ıeliginde bolǵanyna qaramastan, munda tek qazaqstandyq mamandar eńbek etedi - «Paryz-2009» Gran-prı ıegeri

ASTANA. Jeltoqsannyń 2-si. QazAqparat /Arman Asqarov/ - Bizdiń kásiporyn tolyǵymen sheteldikterdiń ıeliginde. Biraq osyǵan qaramastan, bul jerde tek qazaqstandyq mamandar ǵana eńbek etýde. Búgin astanalyq Kongress-Holl saraıynda ótken «Paryz - 2009» syılyǵyn tabystaý saltanaty aıasynda jýrnalısterge suhbat bergen konkýrstyń Gran-prı ıegeri  «Torǵaı  - Petrolıým» AQ-nyń basshysy Abzal Aıdarbaev osylaı aıtty,

 dep habarlaıdy QazAqparat.

Onyń sózine qaraǵanda, 1996 jyldan beri jumys istep kele jatqan «Torǵaı  - Petrolıým» AQ-da bıyl qosymsha 70 jańa jumys orny ashyldy. Kompanııanyń bastamasymen Qyzylorda oblysynyń ákimdigimen birlese otyryp, «Demeý» atty korporatıvti qor quryldy. Bul qorda oblystaǵy barlyq munaı-gaz kompanııalarynyń qarjylyq resýrstary jınaqtalady. Al osy qarajattyń arqasynda mektep pen balabaqsha qurylysy sııaqty san alýan jobalar júzege asyrylyp keledi. «Máselen, bıyl biz Qyzyorda oblysyndaǵy áleýmettik-mádenı oshaqtardy kúrdeli jóndeýden ótkizip, jas mamandardy qaıta daıarlaý isine óz úlesimizdi qostyq», - deıdi A.Aıdarbaev.

Aıta keteıik, búginde «Torǵaı  - Petrolıým» AQ-syn Reseıdiń «Lýkoıl» jáne Qytaıdyń «SNPS» kompanııalary teń bólip basqaryp otyr. «Mundaǵy barlyq qyzmetkerler - qazaqstandyq mamandar. Olardyń sany - 620 adam. Mamandardyń ortasha jalaqysy 3 myń dollardy qurap otyr», - deıdi A.Aıdarbaev.