Kompanııa korporatıvtik oqý ortalyǵyn ashýdy josparlap otyr

ASTANA. KAZINFORM — Qasym-Jomart Toqaev KIA kompanııasy áleýmettik jaýapkershilik aıasynda adam kapıtalyn damytýǵa belsendi túrde ınvestıtsııa salyp kele jatqanyna toqtaldy. Bul týraly Aqorda málim etti.

– Álemdik avtoalpaýyt elimizdegi zaýytty iske qospaı turyp, Qazaqstan jáne Koreıa ýnıversıtetterimen, kolledjderimen uzaq merzimdi yntymaqtastyqty jolǵa qoıa bastady. Budan bólek, bilikti kadrlardy daıarlaý úshin kompanııa korporatıvtik oqý ortalyǵyn ashýdy josparlap otyr. KIA osy arqyly qyzmetkerlerge qamqorlyq – uıym mádenıetiniń mańyzdy bólshegi ekenin kórsetedi. Bul shynaıy qurmet pen nıettestik ortasyn qalyptastyrady. Jumysshy mamandarǵa dál osyndaı qarym-qatynas qoǵamda eńbekqorlyq pen áleýmettik ádildik qundylyqtarynyń ornyǵýyna septigin tıgizedi. Zaýytta óndiris lokalızatsııasyna ekpin qoıylyp otyr. Bul shyǵarylatyn ónimdegi qazaqstandyq úlesti edáýir arttyrýǵa múmkindik beredi. Sarapshylardyń esebinshe, avtozaýyttaǵy árbir jumys orny logıstıka, servıs, ınfraqurylym salalarynda janama túrde bes-alty adamdy jumyspen qamtýǵa yqpal etedi. Bul – jaı ǵana óndiris jelisiniń keńeıýi emes, tolyq ónerkásip klasterin qalyptastyrý úshin jasalǵan zor qadam. Mundaı júıede shaǵyn jáne orta bıznes turaqty damýǵa múmkindik alady. Óndiristi uıymdastyrýdyń osyndaı keshendi tásili Qostanaı oblysynyń ǵana emes, tutas elimizdiń ındýstrııalyq áleýetin kúsheıtedi. KIA zaýyty qazaqstandyq avtoónerkásiptiń órkendeýine tyń serpin beretinine senimdimin. Jańa kásiporynnyń jumysy otandyq avtoparktiń jańarýyna septigin tıgizedi. Ol qalalar men kúre joldardaǵy jol qozǵalysy qaýipsizdigine oń áser etedi, – dedi Memleket basshysy.

Prezıdent memlekettiń mashına jasaý salasyna basa mán beretinin jetkizdi.

– Byltyr osy salaǵa 290 mıllıard teńgeden astam ınvestıtsııa tartyldy. Bul – aldyńǵy jylmen salystyrǵanda eki jarym ese kóp. Osy úrdis bıyl da jalǵasýda. Jyl basynan beri osy salaǵa 178 mıllıard teńge qarajat salyndy. Investorlar Qazaqstanǵa zor qyzyǵýshylyq tanytyp otyr. Aýqymdy sharalardyń nátıjesinde bul baǵytta birqatar tabysqa qol jetkizdik. Ótken jyly elimizde 145 myńnan astam kólik shyǵaryldy. Astana, Almaty, Semeı, Oral, Kókshetaý, Qostanaı jáne Saran qalalarynda avtokólik óndirisine qatysty kásiporyndar jumys istep tur. On myńnan astam azamatymyz osy salada eńbek etedi. Onyń jartysyna jýyǵy – jastar. Al Qostanaıdaǵy zaýytta bir jarym myń adam jumys isteıtin bolady. Jumysshylar jańa daǵdylardy ıgerip, bilikti maman retinde qalyptasady. Aldaǵy ýaqytta kásiporyn ınjenerlerdiń naǵyz sheberhanasy bolady dep senemin, – dedi Qasym-Jomart Toqaev.