Kompıýteri joq oqýshylardy qoldaıtyn arnaıy saıt iske qosyldy
NUR-SULTAN. QazAqparat –qoldau.edu.kz saıtynda qazirdiń ózinde qashyqtan oqý úshin kompıýterler, noýtbýktar men planshetter alatyn 20 myńnan astam bala týraly málimetteri bar. Bul týraly QR Prezıdenti janyndaǵy OKQ ótken onlaın-konferentsııada «Meniń Atamekenim» qoǵamdyq birlestiginiń atqarýshy dırektory Lazzat Chınkısbaeva aıtty, dep habarlaıdy QazAqparat tilshisi.
«Biz bir jyldan astam ýaqyttan beri Qazaqstan Respýblıkasy Bilim jáne ǵylym mınıstrliginiń seriktesimiz. Ótken jyly biz «Mektepke jol» qaıyrymdylyq jobasyn júzege asyrdyq. Ótken jyly álemge áıgili qazaqstandyq ánshi Dımash Qudaıbergen biz arqyly óz kómegin kórsetti. Ol osy aktsııa aıasynda Arys qalasynyń balalaryna qarajat bóldi. Biz aktsııany joǵary deńgeıde ótkizip, balalarǵa sapaly kómek kórsettik. Bıyl elde vırýstyń taralýyna baılanysty balalar sabaqty qashyqtan oqıdy. Biz qoldau.edu.kz https://qoldau.edu.kz/ veb-saıtyn iske qostyq. Eger balańyzdyń kómek alýshylar tiziminde bar-joǵyn bilgińiz kelse, balanyń JSN-niń sońǵy alty sanyn engizýińiz kerek. Biz sizdiń aqparatyńyzdyń qupııalyǵyn saqtaý úshin osylaı jasadyq. Eger sizdiń balańyz ol tizimde bolsa, onda mektebi, aýdany, qala nemese qaı oblys ekeni kórsetiledi», - deıdi Lazzat Chınkısbaeva.
Saıtta kómek kórsetiletin 20 myńnan astam bala týraly málimet bar.
«Qazir bul tizimde 20 myńnan astam bala bar. Biz bul bazany Qazaqstan Respýblıkasy Bilim jáne ǵylym mınıstrliginen aldyq. Bul tizimge jetimder, múmkindigi shekteýli balalar jáne aýyl mektepterindegi oqýshylar kiredi. Eger sizdiń balańyz bul tizimde bolmasa, biz bul kómekke beı-jaı qaramaıtyn adamdardy múmkindiginshe tartýǵa tyrysamyz. Eger biz jasaı alsaq, ekinshi bazaǵa tirkeımiz, múmkin sizdiń balalaryńyz bul tizimge enedi», - deıdi ol.
