Kompıýterdi avtomatty óshirý: Memqyzmetshi jumys ýaqytyn uzarta alady
Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttiginiń Memlekettik qyzmet salasyndaǵy baqylaý departamentiniń dırektory Ravıl Tólebaev málim etti.
«Búgingi kúni bizdiń aldymyzda artyq jumys jasaý faktilerin túbegeıli joıý maqsaty tur. Osyny eskere otyryp Ádep jónindegi ýákildermen birlesip, barlyq memlekettik organdardan SKÝD júıesi arqyly alynatyn jumys ýaqytyna jáne jumys kompıýterleriniń avtomatty óshirilýine taldaý júrgizildi. Onyń qorytyndylary tıisti shara qabyldaý úshin Eńbek jáne halyqty áleýmettik qorǵaý mınıstrligine, sondaı-aq jergilikti jerdegi Eńbek ınspektsııalaryna beriletin bolady», - deıdi ol búgin Astanada ótken brıfıngte.
Ravıl Tólebaevtyń aıtýynsha, sonymen qatar, ıkemdi jumys ýaqytyn engizý máseleleri qaralatyn bolady. Búginde barlyq memlekettik organdarda saýalnama júrgizilýde.
«Budan basqa, osy jyldyń qazan aıynda memlekettik qyzmetshilerdiń quqyqtaryn saqtaýdy qamtamasyz etý maqsatynda Agenttik úkimettik emes uıymdardyń ókilderimen birlesip, birqatar mınıstrlikterde profılaktıkalyq is-sharalar uıymdastyryldy. Nátıjesinde mınıstrlikterde jumys kompıýterlerin saǵat 18.30-da avtomatty túrde sóndiretin ýaqyty elektrondyq esepke alý júıesi engizilgenin atap ótý qajet. Bul rette, memlekettik qyzmetshilerdiń jumysty 30 mınýtqa, 60 mınýtqa, 90 mınýtqa sebebin kórsete otyryp uzartý (Mınıstrdiń, vıtse - mınıstrdiń, jaýapty hatshynyń tapsyrmasy) múmkindigi bar», - deıdi ol.
Eske sala ketsek, buǵan deıin Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev segiz saǵattyq jumys kúnine keıin melekettik organdardaǵy kompıýterlerdiń óshirilýin qadaǵalaýdy tapsyrǵan bolatyn.
