Kommýnıstik partııa Túrkistan halqynyń zeınet jasyn tómendetý jaıly pikirin surap bildi

TÚRKІSTAN. QazAqparat - Búgin Túrkistan qalasynda Qazaqstan kommýnıstik halyq partııasynyń ókilderi «Partııa daýysy» aktsııasyn uıymdastyrdy, dep habarlaıdy QazAqparat tilshisi.

Atalǵan shara barysynda partııa belsendileri jergilikti turǵyndardy mazalaǵan túrli saýaldarǵa qatysty jaýap alyp, saýalnama júrgizdi.

Túrkistandyqtarǵa «Elimizde azamattardyń zeınetke shyǵý jasyn 63-ten 60-qa túsirgen durys pa? Álde bankten jeke tulǵalarǵa berilgen nesıe keshirilsin be?» degen saýaldardy qoıdy.

Aýyldardaǵy onlaın bilim berý júıesiniń sapasyna qatysty pikirin bilip, oflaınǵa kóshý jaıyn kóterdi.

Partııa músheleri sondaı-aq, qala turǵyndarynyń sheshimin tappaı otyrǵan máselelerin surastyryp, ózekti problemalarymen tanysty.

«Halyqtyq kommýnıster» fraktsııasynyń depýtattyq saýalnamasyn taratyp shyqty.

«Halyq kóp júretin jerlerdi tańdap jatyrmyz. Sol halyqtyń muqtajyn úkimetke jetkizsek degen oılarymyz bar. Osy másele boıynsha biz aıyna eki ret aktsııa ótkizip otyramyz. Osy arqyly halyqtyń qoldaýyna ıe bolamyz degen oıdamyz»,- deıdi QHKP Túrkistan oblystyq komıtetiniń birinshi hatshysy Ahmet Eralhan.