Kommýnıstik partııa aýǵan soǵysy ardagerleriniń máselesin kóterdi
Elordada Qazaqstan kommýnıstik halyq partııasy men Qazaqstannyń ınternatsıonalıst-jaýyngerleriniń ardagerler uıymdary ortalyq keńesiniń jıyny ótti. QKHP OK hatshysy, QR Parlamentindegi atalmysh partııa fraktsııasynyń jetekshisi Aıqyn Qońyrov jıynnyń ne úshin uıymdastyrylyp otyrǵanyn aıtyp berdi.
«Elimizde «Ardagerler týraly» zań qabyldandy. Búgingi kúni oǵan qol qoıylyp, qujat negizinde jumys bastalyp ketti. Alaıda osy jyldyń jazynda bizdiń oblystyq qurylymdarǵa ınternatsıonalıst-jaýyngerler júginip, atalmysh zańǵa túzetýler engizý týraly usynystaryn jetkizdi. Taldaý barysynda Qazaqstan kommýnıstik halyq partııasy osy túzetýlerdi qoldaý týraly sheshim qabyldady. Tıisinshe biz ardagerlerdiń áleýmettik qorǵalýyn, baspanamen qamtý, qosymsha járdemaqymen (aýǵan soǵysy ardagerlerin) qoldaý, túptep kelgende mártebesin aıqyndaý bastamasyn kóterýdi jón kórdik», - dedi ol QKHP Nur-Sultan qalalyq komıtetiniń keńsesinde ótken otyrysta.
Aýǵan soǵysy ardagerleri ortalyq keńesiniń múshesi Qaırat Elýbaevtyń aıtýynsha «Ardagerler týraly» zań boıynsha aýǵan soǵysynyń ardagerleri Úkimetpen birge 2007 jyldan beri jumys júrgizilip jatyr.
«2020 jyly zańdy talqylaý kezinde aýǵan soǵysy ardagerleri uıymdarynyń músheleri shaqyrylmaǵan. Ol zańda bizdiń usynystar qabyldanbady. Sol sebepti bizdiń ortalyq keńestiń sheshimimen bul zańdy jetildirý kerek dep sanaımyz. Jalpy aýǵan soǵysy ardagerleriniń mártebesin durystap aıqyndaý kerek. Zańdy talqylaý kezinde aýǵan soǵysynyń ardagerleri áleýmettik jeli bolsyn, vıdeoótinim bolsyn ózderiniń narazylyqtaryn aıtyp kele jatyr», - deıdi ol.
Qaırat Elýbaev aýǵan soǵysyna 22 myńnan astam qazaqstandyq qatysqanyn, sonyń búgin de 16-17 myń adamy qalǵanyn aıtady.
«18-20 jas aralyǵyndaǵy jastar sol ýaqytta soǵysqa bardy. 30 jyl boıy bizge naqty «soǵysqa qatysýshy» degen mártebe berýdi suradyq. Biraq usynystarymyz eskerilmeı keledi. Halyqtyń, Prezıdenttiń jáne Parlamenttiń aldyna osy máseleni qaıta kótereıik dep jatyrmyz», - deıdi ol.
