Kommýnıster dári-dármekterdiń arzandaıtynyna senbeıdi -Májilis depýtaty
ASTANA. QazAqparat - QR Parlament Májilisiniń depýtaty Turǵyn Syzdyqovtyń aıtýynsha, búginde xalyqtyń basym bóligi, ásirese, aýyl turǵyndary «dári-dármektiń baǵasy túsedi» degen sózge kóp sene bermeıdi, dep xabarlaıdy QazAqparat tilshisi.
«Tegin dári-dármekti alatyn adamdardyń uzynsonar kezekteri azaıatyn emes. Halyqty emdeýge qajetti bıýdjet qarjysy durys bólinbeıdi. Aımaqtarǵa preparattar ýaqytynda jetkizilmeıdi. Sonyń barlyǵy emdeý sharalaryna da keri áserin tıgizip otyr. Dárixanalarda baǵa aıyrmashylyǵy jer men kókteı», - dedi Syzdyqov búgingi plenarlyq otyrysta.
Osyǵan baılanysty depýtat óz atynan QR Densaýlyq saqtaý mınıstri Eljan Birtanovtyń atyna saýal joldady.
Onyń oıynsha, Prezıdent Nazarbaevtyń dári-dármek salasyn retteýge qatysty tapsyrmasy áli kúnge oryndalmaı otyr.
«Farmatsııa komıeti dári-dármektiń baǵasyn qalaısha retteıtinin jan-jaqty túsindirmeıdi. Halyqtyq kommýnıster fraktsııasy Memleket bashysynyń tapsyrmasyn oryndaý jumystary belgisiz sebepterge baılanysty sozylyp ketti dep sanaıdy. Osyǵan baılanysty Sizden, Eljan Amantaıuly, dári-dármekterdiń baǵasyn retteýge qatysty barlyq qujattardy usynyp, osy tapsyrmany oryndaý merzimi men oǵan jaýapty azamattardy kórsetýdi suraımyz», - dep atap kórsetti Syzdyqov.
Aıta keteıik, jaqynda QR Densaýlyq saqtaý mınıstrligi farmatsııa komıtetiniń ókili Arnur Nurtaev aldaǵy ýaqytta dári-dármekterdiń shekti baǵasy qalaısha engiziletinin túsindirgen bolatyn.
