Kommýnaldyq qyzmetkermin degen almatylyq boıjetken zeınetkerlerdi tonap ketken
ALMATY. QazAqparat - 27 jastaǵy almatylyq boıjetken ózin «kommýnaldyq mekeme qyzmetkermin» dep tanystyryp, zeınetkerlerdi tonaýmen aınalysqan, dep habarlaıdy QazAqparat tilshisi.
Almaty oblystyq ІІD baspasóz qyzmetiniń habarlaýynsha, Taldyqorǵan qalasy polıtsııasyna 82 jáne 78 jastaǵy keıýanalar habarlasqan. Olardy úıine kelgen kommýnaldyq qyzmetker tonap ketken.
«Aldyn ala tekserý boıynsha alaıaq áıel kommýnaldy qyzmet ókili retinde tanysyp, qarııalardyń senimine ábden kirip alǵan. Qyz turǵyndardyń úılerine sý, elektr energııasy, jylýdy eseptegish quraldardy tekserýge keletin bolǵan. Sosyn mardymsyz zańbuzýshylyqtary úshin olarǵa aıyppul salyp otyrǵan. Tipti, qarııalardyń nazaryn basqa jaqqa aýdaryp, qomaqty aqshasyn jymqyryp otyrǵan. Ol páter ıelereniń 100 myń teńgege jýyq qarjysyn alyp ketken. Keıin belgili bolǵandaı, urlanǵan qarjy qarııalardyń zeınetaqysynan tam-tumdap jınaǵan aqshasy eken»,- dedi baspasóz qyzmetinen.
Atalǵan derek boıynsha polıtsııa qyzmetkerleri alaıaqtyq pen urlyq boıynsha qylmystyq is qozǵady.
Osy oqıǵaǵa baılanysty 27 jastaǵy almatylyq boıjetken ustaldy.
«QR QK-niń 188-baby men 190-babymen sotqa deıingi tergeý jumystary bastaldy. Ustalǵan azamatshanyń basqa da qylmystarǵa qatystylyǵy tekserilip jatyr», - delingen habarlamada.
