Kommýnaldyq qyzmetke 15 myń teńge tóleýge ótinim qabyldaý ákimdikter arnaýly júıeni iske qosqan soń bastalady

NUR-SULTAN. QazAqparat - Kommýnaldyq qyzmetter úshin 15 myń teńge tóleýge ótinim qabyldaý ákimdikter ótinim qabyldaıtyn arnaýly júıeni iske qosqan soń bastalady. Bul týraly QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap habarlaıdy.

«Kommýnaldyq qyzmetterdi jetkizýshilerdiń shyǵyndaryn óteý tártibi aǵymdaǵy jyldyń 18 sáýirinde bekitildi jáne búgingi tańda ákimdikter ótinimderdi qabyldaý úshin call-ortalyqtar men aqparattyq resýrstar qurý boıynsha shuǵyl sharalar qabyldap jatyr. Ákimdikter ótinimderdi qabyldaıtyn arnaýly júıeni daıyndaǵannan keıin ol týraly jergilikti halyqty habarlandyrady. Atalǵan jumys múmkindiginshe qysqa merzim ishinde júrgiziledi. Sondyqtan ótinim berý úshin ákimdikterden tıisti aqparatty kútý qajet»,-delingen habarlamada.

Sondaı-aq atalǵan kózden málim bolǵanyndaı, memleket aǵymdaǵy jyldyń sáýir jáne mamyr aılary úshin kommýnaldyq qyzmetterge aqy tóleıdi, sondyqtan ótinim berýge asyqpaý qajet. Óıtkeni barlyq ótinishter mamyr aıyn qosa alǵandaǵy kezeńde qabyldanady. Ótinimder call-ortalyqtar men aqparattyq júıeler arqyly qabyldanady. Ákimdikterge tutynýshynyń jeke sáıkestendirý nómirin, áleýmettik mártebesin jáne esepshotynyń derekterin usyný qajet.

Esterińizge sala keteıik, Qazaqstan Respýblıkasy Prezıdentiniń tapsyrmasyn oryndaý maqsatynda Indýstrııa jáne ınfraqurylymdyq damý mınıstrligi Tótenshe jaǵdaı kezeńinde kommýnaldyq qyzmetterdi jetkizýshilerdiń shyǵyndaryn óteý qaǵıdalaryn bekitti.