Kommýnaldyq qajettilikke jáne halyqqa qansha kómir jóneltildi
NUR-SULTAN. QazAqparat – Kómir eksporty 20 mln tonnaǵa jýyqtady. Bul týraly Úkimet otyrysynda Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.
«2019 jylǵy 19 qyrkúıektegi jaǵdaı boıynsha kómir óndirýshi kompanııalar 75,1 mln tonna kómir óndirdi, bul ótken jyldyń uqsas kezeńimen salystyrǵanda 97,2 paıyzdy qurady. Elimizdiń ishki naryǵyna osy kezeńde 51,5 mln tonna kómir jóneltildi. Energııa óndirýshi kásiporyndarǵa 39,6 mln tonna kómir jóneltildi, bul 2018 jyldyń uqsas kezeńimen salystyrǵanda 1,4 paıyzǵa az. Ónerkásiptik kásiporyndarǵa 4,8 mln tonna kómir jetkizildi, bul ótken jyldyń sáıkes kezeńimen salystyrǵanda 15,2 paıyzǵa kem. Kommýnaldyq turmystyq qajettilikke jáne halyqqa 7,1 mln tonna kómir jóneltildi», - dedi mınıstr.
Onyń sózine qaraǵanda, kómir eksporty 19,8 mln tonnaǵa jetip, bul ótken jyldyń sáıkes kezeńimen salystyrǵanda 100,4 paıyzdy qurady.
Budan buryn habarlanǵandaı, búgin Úkimet otyrysynda Premer-Mınıstr Asqar Mamın óńirlerdi qajetti kólemde kómirmen qamtamasyz etýdi tapsyrdy.
«Jylytý maýsymyna daıyndyq jumystary júrip jatyr. Degenmen de bekitilgen kesteden qalyp qoıý jaǵdaılary da oryn alýda. Kommýnaldyq qajettilikter men turǵyndar úshin kómir daıyndaý deńgeıi áli de tómen», - dep toqtaldy Úkimet basshysy.
