Kommýnaldyq qaryzyn tólemegenderdiń dúnıe-múlki tárkilenýde

QOSTANAI. QazAqparat - Qostanaılyqtardyń kommýnaldyq qyzmetterge qaryzy kóbeıgen, dep habarlaıdy QazAqparat Qostanaı jylý-energetıkalyq kompanııasynyń baspasóz qyzmetine silteme jasap.

Qostanaı jylý-energetıkalyq kompanııasynyń (QJEK) ókilderi oblys ortalyǵy turǵyndarynyń jylý men ystyq sýǵa qaryzdarynyń kóbeıýine alańdaýly. Kompanııanyń esebinshe, qazirgi ýaqytta qala turǵyndary jylý men ystyq sý úshin 600 mıllıon teńge qaryz. Monopolısterdiń ýájine qulaq asar bolsaq, tólemderdiń der kezinde júrgizilmeýi kompanııa jumysyna nusqan keltirýde. Al qaryzdyń qordalanýy qubyr jóndeý, aldaǵy qysqa ázirlik naýqanyna kesirin tıgizýi múmkin.

Kompanııanyń jurtshylyqpen baılanys jónindegi mamany Saltanat Qasenovanyń sózinshe, qaryz mólsherin QJEK jeke saıtynan bilýge bolady jáne de birqatar bankterdiń ınternet qosymshalary arqyly tólem jasaýǵa múmkindik bar.

«Qaryz kún saıyn artyp keledi. Bizdiń saıttyń «Abonentterge» bóliminde jylý jáne ystyq sýǵa tólenbegen somany bilý múmkindigi qarastyrylǵan. Saıttaǵy aqparat kúndizgi saǵat 11.00-de jańartylady. Abonentter derekter bazasyna mekenjaıy jónindegi aqparatty engizý arqyly qaryzyn bile alady. Burynǵydaı QJEK kezekshi bólimine qońyraý shalyp, ýaqyt joǵaltpaısyz», - dedi Saltanat Qasenova.

Jylý maýsymyn qaryzsyz, oıdaǵydaı aıaqtaýǵa talpynǵan kompanııa ókilderi boryshkerlermen jumysty barynsha jandandyrýdy jón kórgen. Atap aıtqanda, kompanııa qyzmetkerleri boryshkerlerdiń páterlerin aralap, eskertý paraqtaryn taratýda. Al ony pysqyrmaǵandarmen kúresýge sot oryndaýshylary jumyldyrylǵan. Jeke sot oryndaýshylary boryshkerlerdiń dúnıe-múlikterin buǵattap, boryshkerlerdiń ózderin shekaradan attap baspaıtyndaı etip shekteý qoıyp jatyr. Keıbiriniń múlikterin sot sheshimine saı tárkilep, kompanııanyń kádesine jaratýda.