Kommýnaldyq qaldyqtardy joıýǵa qarjy bólý kerek - depýtat

NUR-SULTAN. QazAqparat - Kommýnaldyq qaldyqtardyń kólemi jyl saıyn ósip keledi, al bizde mundaı qaldyqtardy basqarý júıesi áli de bolmaı otyr. Senator Sultan Dúısembınov óziniń depýtattyq saýalynda osy jaǵdaıǵa alańdaýshylyq bildirdi, dep habarlaıdy QazAqparat tilshisi.

Onyń aıtýynsha, qoqys polıgondary eldi mekenderdiń damýyna kedergi bolyp, azamattardyń ómir súrý sapasyn tómendetedi jáne ekologııany nasharlatady, keıde adamdardyń densaýlyǵyna eleýli qaýip tóndiredi.

Senator tutyný qaldyqtaryn basqarýdyń aımaqtyq júıesin qurýǵa qarjy bólý jaıynda usynysyn jarııa etti. Sóıtip, qalyptasqan tolyqqandy sala ekologııany jaqsartýǵa aıtarlyqtaı qarjylyq tabys ákeledi.

«Ónerkásip qaldyǵy men tutyný qaldyǵyn basqarý jóninde keshendi sharalar qabyldaýdy jáne sol sharalardy iske asyrý úshin qarjylandyrý kózin anyqtaýdy usynamyz. Kommýnaldyq qaldyqtar jónindegi memlekettik esep berýge taldaý jasaý ári onyń sapasyn arttyrý jónindegi is-sharalardy ázirleý kerek. Sonymen qatar, kommýnaldyq qaldyqtarǵa qatysty jumys isteýdiń óńirlik júıesin qurý jáne odan ári damytý úshin qarjylandyrý tásilderin aıqyndaý men ony iske qosý jónindegi uıymdastyrý sharalaryn qamtamasyz etý máselesin qaraý ári pılottyq jobasyn belgileý, sondaı-aq Dúnıejúzilik bank usynyp otyrǵan «Almaty aglomeratsııasynyń kommýnaldyq qaldyqtaryn basqarýdyń keshendi tsıfrlyq SMART-júıesi» jobasyn iske asyrýǵa járdem kórsetý qajet», - dedi senator.