Kommýnaldyq qaldyqtardy shyǵaratyn kompanııalar qyzmetin baqylaý kúsheıtilmek
NUR-SULTAN. QazAqparat - Kommýnaldyq qaldyqtardy shyǵarýmen aınalysatyn kompanııalar qyzmetin baqylaýǵa alý kerek. Bul týraly búgin QR Energetıka mınıstrligi Ekologııalyq retteý jáne baqylaý komıteti tóraǵasynyń orynbasary Zulfyhar Joldasov aıtty, dep habarlaıdy QazAqparat tilshisi.
"Qazirgi ýaqytta qaldyqtardy shyǵarýmen aınalysatyn kásiporyndardyń qyzmeti lıtsenzııalanbaıdy. Sondyqtan qaldyqtardy joıý, tasymaldaý jáne qaıta óńdeýge jumyldyrylǵan kásiporyndardy retteýdiń belgili bir tetikterin usynamyz", - dedi komıtet tóraǵasynyń orynbasary elordada ótken "Ekologııalyq zańnamany reformalaý - qazirgi ahýaly men bolashaǵy" taqyrybyndaǵy pikirtalas alańynda.
Osy oraıda mınıstrlik ókili atalǵan kompanııalardyń keıbiri qaldyqtar men qoqystardy belgisiz baǵytqa tasymaldaıtyndyǵy belgili ekendigin aıtty.
"Qazirgi ýaqytta úlken kompanııalardyń óz qaldyqtaryn belgisiz kompanııalarǵa beretindigi, bul rette olarǵa eshqandaı jaýapkershilik júktelmeıtindigine qatysty kóptegen faktiler bar. Sodan keıin ol kompanııalardy qaldyqty qaıta óńdeýge ne ruqsaty, ne múmkinshiligi joq ekenin anyqtap jatamyz. Bul tizbekti qadaǵalap otyrý óte kúrdeli. Mundaı jaıt qazirgi ýaqytta kommýnaldyq qaldyqtarǵa da baılanysty. Qaldyqtardy ortalyq polıgonnan bólek belgisiz baǵytqa tasıtyn júzdegen kásiporyndar bar. Biz bul baǵytta baqylaýdy, jaýapkershilikti kúsheıtý qajet dep sanaımyz", - dedi Z.Joldasov.
Aıta keteıik, "Qazaqstannyń ekologııalyq uıymdary qaýymdastyǵy" ZTB uıymdastyrǵan sharada elimizdiń jańa Ekologııalyq kodeksiniń jobasy talqylandy.
