Kommýnaldyq aqyny artyq tólegeni úshin kimge qansha aqsha qaıtarylady
ASTANA. QazAqparat - Resmı málimetke sáıkes, ótken jylý maýsymy kezinde respýblıka boıynsha barlyq tutynýshylar 900 mln teńgeni artyq tólep qoıǵan. Sebebi daladaǵy aýa temperatýrasy ártúrli boldy. Endi, monopolıster ol aqshany bıylǵy tólemderdiń esebinen shegerip tastaýy tıis, dep xabarlaıdy QazAqparat tilshisi.
Tabıǵı monopolııalardy retteý jáne básekelestikti qorǵaý komıteti tóraǵasynyń orynbasary Asan Darbaevtyń usynǵan málimeti boıynsha, monopolısterdiń naqty qaryzy 910 mln 214 myń teńgeni qurap otyr. Ár oblysta qaıtarylatyn aqshanyń kólemi ártúrli. Máselen, Qaraǵandy oblysy - 233 mln, Shyǵys Qazaqstan - 129 mln, Qostanaı oblysy - 66,5 mln, Batys Qazaqstan - 48,3 mln, Jambyl oblysy - 44,6 mln, Aqmola oblysy - 21,1 mln, Qyzylorda oblysy - 19,5 mln, Pavlodar oblysy - 14,4 mln, Aqtóbe oblysy - 12,4 mln, Atyraý oblysy - 9,7 mln, Soltústik Qazaqstan oblysy - 9,3 mln, Mańǵystaý oblysy - 8,3 mln, Ońtústik Qazaqstan oblysy - 1,9 mln, Almaty oblysy - 613 myń teńge, Astanada qaryzdyń kólemi 1,6 mln teńgeni qurasa, Almaty qalasynda 289,1 mln teńge xalyqqa qaıtarylýy tıis.
«Endi, biz árbir páterge qansha aqshanyń qaıtarylatynyn eseptegen joqpyz. Sebebi árbir aımaqta tólemaqynyń kólemi árqıly. Máselen, Astanada 1,6 mln teńgeni jylýdy tutynatyn barlyq páterlerge bólsek, qaıtarylatyn aqshanyń somasy shyǵady», - dedi Darbaev QazAqparat tilshisine bergen suxbatynda.
Aıta keteıik, qaıtarylǵan aqsha árbir adamnyń jeke esepshotynda avans retinde kórsetilýi kerek. Ótken jylǵy jylý maýysymynda artyq tólengen aqsha aǵymdaǵy maýsymda qaıtarylýy shart.
