Kommýnaldyq jelilerdiń tozýy 40%-ǵa deıin azaıtylmaq
ASTANA. KAZINFORM – 2030 jylǵa qaraı kommýnaldyq jelilerdiń tozýyn 40%-ǵa deıin tómendetý josparlanyp otyr. Bul týraly Ónerkásip jáne qurylys mınıstrliginiń baspasóz qyzmeti habarlady.
Halyqty sapaly aýyzsýmen qamtamasyz etý — Qazaqstannyń memlekettik saıasatynyń negizgi baǵyttarynyń biri ári azamattardyń ómir súrý sapasyn arttyrýdyń mańyzdy faktory.
— 2021 jyldan bastap 2026 jyldyń I toqsanyna deıin sýmen jabdyqtaý júıesin damytýǵa 835 mlrd teńgeden astam qarajat baǵyttaldy. Osy kezeńde 34 qala men 756 aýyldyq eldi mekenniń turǵyndary ortalyqtandyrylǵan sýmen jabdyqtaý qyzmetine qol jetkizdi. Budan bólek, 699 aýylda sý tazartýdyń zamanaýı blok-modýldik stantsııalary ornatyldy, — delingen mınıstrlik habarlamasynda.
Sýmen jabdyqtaý jelilerin salý jáne rekonstrýktsııalaý, sý alý qurylystaryn jańǵyrtý, sondaı-aq ınfraqurylymdy jańartý boıynsha aýqymdy jobalar iske asyryldy.
Salany júıeli damytý maqsatynda «Energetıkalyq jáne kommýnaldyq sektorlardy jańǵyrtý» ulttyq jobasy qabyldandy.
Qujat ınfraqurylymdy keshendi jańǵyrtýdy, tsıfrlyq sheshimderdi engizýdi jáne energııa tıimdiligin arttyrýdy kózdeıdi. 2030 jylǵa qaraı kommýnaldyq jelilerdiń tozýyn 40%-ǵa deıin tómendetý josparlanyp otyr.
Tsıfrlandyrý máselesine erekshe nazar aýdarylýda. Sý esepteý quraldary, avtomattandyrylǵan basqarý júıeleri (SCADA, ASKÝV) jáne Smart Water elementteri engizilýde. Bul sý shyǵyndaryn azaıtyp, eseptiń ashyqtyǵyn arttyrýǵa jáne júıelerdiń turaqty jumysyn qamtamasyz etýge múmkindik beredi.
Qabyldanyp jatqan sharalar kesheni eldiń árbir turǵynyn sapaly ári senimdi sýmen qamtamasyz etýge baǵyttalǵan.
Aıta ketelik halyqty aýyzsýmen 100% qamtý jospary qalaı júrgizilip jatqany týraly jazǵan edik.