Kommýnaldyq jelilerdi jańǵyrtýǵa 13 trln teńge ınvestıtsııa baǵyttalady
ASTANA. KAZINFORM – Sońǵy eki jylda «Tarıfti ınvestıtsııaǵa aıyrbastaý» baǵdarlamasy aıasynda turǵyn úı-kommýnaldyq sharýashylyq salasyna shamamen 605 mlrd teńge ınvestıtsııa tartyldy. Osy qarajat esebinen 12,3 myń shaqyrym ınjenerlik jeli jóndelip, sonyń nátıjesinde ınfraqurylymnyń ortasha tozý deńgeıi 6,2 paıyzdyq tarmaqqa tómendedi. Bul týraly Úkimettiń baspasóz qyzmeti habarlady.
Jylý, elektr, sýmen jabdyqtaý jáne sý burý jelilerin keshendi jańǵyrtý maqsatynda «Energetıka jáne kommýnaldyq sektorlardy jańǵyrtý» ulttyq jobasy qabyldandy. Jobanyń negizgi maqsaty — el boıynsha jabdyqtar men ınjenerlik jelilerdiń tozý deńgeıin 40%-ǵa deıin tómendetý, sondaı-aq apattyq deńgeıdi 20%-ǵa qysqartý. Jobany júzege asyrýǵa tartylatyn ınvestıtsııalardyń jalpy kólemi shamamen 13 trln teńge.
Kommýnaldyq sektordy jańǵyrtý aıasynda 86 myń shaqyrym ınjenerlik jelini jańartýǵa 6,8 trln teńge baǵyttaý josparlanyp otyr. Onyń ishinde:
77,6 myń shaqyrym elektr jelisi;
4,7 myń shaqyrym sýmen jabdyqtaý jelisi;
2,6 myń shaqyrym sý burý jelisi;
1,6 myń shaqyrym jylý jelisi.
2025 jyly Ulttyq jobany júzege asyrý aıasynda aktıvteriniń tozý deńgeıi joǵary 17 pılottyq jobaǵa shamamen 31,7 mlrd teńge kóleminde qarjy bólindi. Jańǵyrtýdyń tarıfterge áserin azaıtý maqsatynda qaryzdar boıynsha syıaqy mólsherlemelerin sýbsıdııalaýdy kózdeıtin túzetýler qabyldandy. Al halyqtyń áleýmettik osal toptary úshin kommýnaldyq qyzmetterge jumsalatyn shyǵyndardy óteýge ataýly áleýmettik kómek qarastyrylǵan.
Taǵy 6,2 trln teńge belgilengen qýatty 32,6 GVt-qa deıin arttyrý úshin jańa elektr energııasyn óndirý qýattaryn jańǵyrtýǵa jáne salýǵa jumsalady. Bul rette Úkimet otandyq óndirýshilerge basymdyq beredi: 2,24 trln teńgege 2 786 taýar pozıtsııasy aıqyndaldy, 220 qazaqstandyq zaýyttan jáne óńirlerde 669 bilikti EP-merdigerlerden pýl qalyptastyryldy.
Aıta ketelik Pavlodar, Shymkent jáne Atyraý MÓZ-deriniń qýaty kezeń-kezeńimen ulǵaıtylady.
