Kommýnaldyq tólem somasynyń artýy nemen baılanysty — komıtet túsinikteme berdi
ASTANA. KAZINFORM — Osy aıda kóptegen qazaqstandyqtyń kommýnaldyq tólem túbirtekterinde somalar ádettegiden joǵary bolyp shyqty. Mamandardyń aıtýynsha, bul tarıfterdiń kóterilýinen emes, sýyq aýa raıyna baılanysty jylý tutynýdyń artýy jáne QQS esebiniń ózgerýimen túsindiriledi.
Tabıǵı monopolııalardy retteý komıtetiniń baspasóz qyzmetiniń aqparatyna sáıkes, qazir retteletin kommýnaldyq qyzmetterge tarıfterdi kóterýge moratorıı qoldanylady. Bul rette retteletin kommýnaldyq qyzmetterge mynalar jatady: elektrmen jabdyqtaý, jylýmen jabdyqtaý, sýmen jabdyqtaý jáne sý burý.
— Atalǵan kezeńde QR Ulttyq ekonomıka mınıstrliginiń Tabıǵı monopolııalardy retteý komıteti jáne onyń aýmaqtyq departamentteri tarıfterdi qaıta qaraý men arttyrý sharalaryn júrgizgen joq. 2025 jylǵy jeltoqsan jáne 2026 jylǵy qańtar aılary úshin jylýmen jabdyqtaý qyzmetteri boıynsha esepteýler úıdiń jalpy jylý energııasyn esepke alý aspaptarynyń naqty kórsetkishteri negizinde júrgizilip, qoldanystaǵy zańnama talaptaryna sáıkes páterlerdiń alańyna proportsıonaldy túrde bólindi, — deıdi mamandar.
Júrgizilgen tekserý nátıjesinde 2026 jylǵy qańtar aıyndaǵy tólem qujattarynda somalardyń ulǵaıýy jylytý kezeńinde jylý energııasyn naqty tutynýdyń artýyna baılanysty ekeni anyqtaldy.
— Tutyný kólemi tikeleı syrtqy aýa temperatýrasyna jáne jylýmen jabdyqtaý rejımine táýeldi. Aýa temperatýrasy neǵurlym tómen bolǵan saıyn, jylý energııasyn tutyný kólemi soǵurlym artady. Mysaly, ótken jyldyń jeltoqsan aıynda Astana qalasy boıynsha ortasha aılyq temperatýra -8 °C bolsa, aǵymdaǵy jyldyń qańtar aıynda -14,3 °C qurady. Bul jylý energııasyn tutynýdyń artýyna jáne sonyń nátıjesinde tólem qujattarynda somalardyń ózgerýine áser etti, — delingen komıtet bergen túsiniktemede.
Vedomstvo atap ótkendeı, elektr energııasy, sýmen jabdyqtaý jáne sý burý qyzmetteri boıynsha esepteýler esepke alý quraldarynyń naqty kórsetkishteri negizinde júrgiziledi. Tutynýshylar kórsetkishterdi ýaqtyly tapsyrǵan jaǵdaıda esepteý naqty tutynylǵan kólem boıynsha júzege asyrylady. Aıta ketý qajet, retteletin kommýnaldyq qyzmetter tarıfteri qosylǵan qun salyǵyn (QQS) esepke almaı bekitiledi.
— Qyzmet naqty kórsetilgen kezde QQS salyq zańnamasyna sáıkes tólem qujattaryna engiziledi jáne tóleýge jatatyn sońǵy somaǵa áser etedi. Ortasha alǵanda túbirtekterdegi somalardyń ulǵaıýy shamamen 3–4% quraıdy jáne bul tarıfterdiń ósýi bolyp eseptelmeıdi. Mysal retinde: eger qyzmet boıynsha eseptelgen soma 500 teńge bolsa, QQS mólsherlemesi 12% kezinde salyq somasy 60 teńgeni, jalpy tólem — 560 teńgeni quraıdy; al 16% mólsherleme kezinde salyq 80 teńge, jalpy tólem — 580 teńge bolady, ıaǵnı tólemniń naqty ósimi 20 teńgeni nemese burynǵy tólemniń shamamen 3,6%-yn quraıdy jáne bul tarıfterdiń qaıta qaralýymen baılanysty emes, — dep túsindirdi komıtettegiler.
Sonymen qatar, tólem túbirtekteri, ádette, tek retteletin kommýnaldyq qyzmetterdi ǵana emes (elektr, jylý, sý jáne sý burý), sondaı-aq básekeli ortada kórsetiletin ózge de qyzmetterdi qamtıdy. Olardyń ishinde telekommýnıkatsııalyq qyzmetter, lıft sharýashylyǵyn qyzmet kórsetý, ortaq múlikti basqarý jáne kútip ustaý (OSI/KSK), sondaı-aq ózge de qosymsha qyzmetter bar.
— Osyǵan baılanysty túbirtektegi jalpy somanyń ulǵaıýy tek kommýnaldyq resýrstardy naqty tutyný kólemimen jáne salyq quramdasymen ǵana emes, sonymen birge atalǵan qosymsha qyzmetter boıynsha esepteýlerdiń ózgerýimen de baılanysty bolýy múmkin. Júrgizilgen taldaý nátıjesinde kelip túsken shaǵymdardyń jeke sıpatta ekeni jáne naqty turǵyn jaılar boıynsha esepteýlerdiń erekshelikterimen (tutyný kólemi, bólýdiń durystyǵy, kórsetkishterdi alý kezeńi, qaıta esepteýlerdiń bolýy, tólemniń keshiktirilýi jáne ózge de jaǵdaılar) baılanysty ekeni anyqtaldy. Tolyq túsindirme alý jáne esepteýlerdi salystyrý úshin tutynýshylarǵa aldymen tıisti qyzmet boıynsha tólemdi esepteıtin tabıǵı monopolııa sýbektisine júginý usynylady. Eger másele sheshilmegen jaǵdaıda nemese usynylǵan túsindirmelermen kelispegen jaǵdaıda, tutynýshy tıisti óńir boıynsha Tabıǵı monopolııalardy retteý komıtetiniń aýmaqtyq departamentine nemese «e-Otinish» azamattardyń ótinishterin qabyldaý jáne óńdeýdiń biryńǵaı platformasy arqyly shaǵymdanýǵa quqyly, — delingen habarlamada.
Tutynýshylardyń zańdy múddelerin qorǵaýǵa járdem kórsetý týraly ótinishter kelip túsken jaǵdaıda jáne negizder bolǵan kezde, aýmaqtyq departament Qazaqstan Respýblıkasynyń Kásipkerlik kodeksine sáıkes monopolııa sýbektisine qatysty jospardan tys tekserý júrgizedi.
Sonymen qatar, áleýmettik osal sanattaǵy azamattar úshin turǵyn úı kómegin kórsetý tetigi qarastyrylǵan. Eger kommýnaldyq qyzmetterge jumsalatyn shyǵyndar otbasynyń jıyntyq tabysynyń belgilengen úlesinen asyp ketse, ataýly qoldaý kórsetiledi. Bul sharalar tutynýshylarǵa shamadan tys qarjylyq júktemeni boldyrmaýǵa baǵyttalǵan.
Budan buryn Qyzylordada kommýnaldyq máselelerge qatysty aı saıyn 15 myńnan astam ótinish túsetini aıtyldy.
