Kommýnaldyq tarıfter qunynyń ózgerýine ne áser etedi
ASTANA. KAZINFORM — Qazaqstanda tarıfterdiń ózgerýine birqatar negizgi faktor áser etedi. Bul týraly QR Ulttyq ekonomıka mınıstrligi Tabıǵı monopolııalardy retteý komıtetiniń tóraǵasy Tımýr Qosymbaev málim etti.
Onyń aıtýynsha, tarıfter ınflıatsııa deńgeıine sáıkes ındeksatsııalanady. Sonymen qatar tarıfterdiń qalyptasýyna strategııalyq taýarlar baǵasynyń ózgerýi tikeleı yqpal etedi.
— Jylýmen jabdyqtaý qyzmetteriniń qunyna kómir baǵasy tikeleı áser etedi, onyń qymbattaýy túpki tutynýshy úshin tarıfterge yqpal etedi. Strategııalyq taýarlarǵa kómir, mazýt jáne janar-jaǵarmaı jatady, — dedi spıker.
Sondaı-aq tarıfterge ınfraqurylymdy jańǵyrtýǵa baǵyttalǵan ınvestıtsııalar men óndiristik personaldyń eńbekaqysyn arttyrý da áser etedi.
— Ulttyq joba aıasynda 6,8 trln teńge ınvestıtsııa tartý josparlanǵan. Bul qarajat 86 myń shaqyrym ınjenerlik jelini jóndeýge baǵyttalady. Nátıjesinde kommýnaldyq ınfraqurylymnyń tozý deńgeıi 40 paıyzǵa deıin tómendeýi kózdelip otyr, — dedi ol.
Sonymen qatar komıtet tóraǵasy qazirgi tańda elde 62 tabıǵı monopolııa sýbektisi «qyzyl aımaqta» ornalasqanyn aıtty. 2025 jyldyń qorytyndysy boıynsha olardyń 8-i «qyzyl aımaqtan» «sary aımaqqa» ótken.
— Jalpy alǵanda, 58 sýbekt «sary aımaqta», al 98 sýbekt «jasyl aımaqta» tur. Jasyl aımaqtaǵy kásiporyndardyń tozý deńgeıi 50 paıyzdan tómen, — dep tolyqtyrdy ol.
Buǵan deıin tabıǵı monopolııa sýbektilerine 900 mln teńgege jýyq aıyppul salynǵanyn jazǵanbyz.
