Kommýnaldyq sharýashylyq kompanııalary jóndeý jáne jelige qosý qyzmetteriniń baǵasyn zańsyz ósirip otyr – Agenttik ókili
ASTANA. KAZINFORM – Májiliste tabıǵı monopolııa sýbektileriniń qyzmetin retteıtin zań jobasy talqylanyp jatyr. Qujatty tanystyrǵan Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov turǵyn úı-kommýnaldyq sharýashylyq salasynda qordalanǵan olqylyqty ashyp aıtty.

- 2017 jyldan beri tabıǵı monopolııa sýbektisiniń basqa qyzmetter kórsetýine qoıylǵan 5 paıyzdyq shekteýdi alyp tastaǵanbyz. Buryn tabıǵı monopolııa sýbektileri kórsetetin qyzmetterdiń negizgi qyzmetinen basqa túrleri jalpy qyzmettiń 5 paıyzynan aspaýy kerek bolǵan. Osy shekteýdi 2017 jyly alyp tastaǵannan keıin-aq tabıǵı monopolııa sýbektileri qarjylandyrý shekteýli bolýyna jáne tarıfterdi tizgindeý sharalaryna baılanysty kórsetetin qyzmetterin bólshektep nemese tabıǵı monopolııa aıasynan shyǵara bastady. Jóndeý jumystary, jelige qosý, jylýmen qamsyzdandyrý salasyndaǵy syǵymdaý qyzmetteri tabıǵı monopolııa aıasynan shyǵaryldy. Basqasha aıtqanda osy sııaqty qyzmetterdiń baǵasyn memleket rettemeıtindeı jol taýyp aldy, - dedi ol depýtat suraǵyna bergen jaýabynda.
Aıtýynsha, bul qyzmetterdiń taza monopolııalyq qyzmet bolǵandyqtan baǵasyn memleket retteý kerek bolǵan.
- Biz taldaý jasap, 600-ge jýyq qyzmettiń tabıǵı monopolııa aıasynan shyǵarylǵanyn anyqtadyq. Ókinishke qaraı, tarıf retteýshiler bul máseleni baqylap otyrǵan joq. Óıtkeni tabıǵı monopolııa sýbektilerin bul jaǵynan qyssa, syıaqy qoryn qysqartý sııaqty sharalar qabyldaýǵa týra keletinin biledi. Biraq taıaqtyń ekinshi ushy tutynýshylardyń múddesine tıip jatyr. Kesirinen tutynýshylar atalǵan qyzmetterdiń aqysyn qoldan kóterilgen quny boıynsha tóleýge májbúr. Jyl saıyn dep qarasaq, atalǵan qyzmetterdiń quny 2-3 esege jýyq ósip jatqanyn kórip otyrmyz. Ol baǵalardy eshkim baqylap jatqan joq. Bul jerde memlekettiń saıasaty túsinikti bolý kerek. Monopolııaǵa jatatyn qyzmetterdiń bári memleket tarabynan baǵa belgileý tetigi arqyly rettelýi kerek, - dedi Rýstam Ahmetov.
Buǵan deıin elimizde Tutynýshylardyń quqyǵyn qorǵaý salasynda ombýdsmen ınstıtýty engiziletinin jazǵan edik.