Kommýnaldyq sektorǵa ártúrli qarjy kózderinen 1,9 trıllıon teńge tartylady
ASTANA. KAZINFORM – 2030 jylǵa deıin sýmen jabdyqtaý jelileriniń tozý deńgeıi 33, sý burý jelileri 41 paıyzǵa deıin tómendetiledi. Bul týraly búgin Úkimet otyrysynda Ónerkásip jáne qurylys vıtse-mınıstri Qýandyq Qajkenov aıtty.
Onyń aıtýynsha, qol jetkizilgen nátıjelerge qaramastan sýmen jabdyqtaý jáne sý burý ınfraqurylymyn damytý jumystary jalǵasyp jatyr. Halyq sanynyń ósýi, jelilerdiń tozýy jáne jańa aýdandardyń salynýy osy baǵytta júıeli jumystar júrgizýdi jáne qyzmet sapasyn arttyrýdy talap etedi.
— Bul mindetterdi oryndaý úshin qarjylyq ınvestıtsııalar men basqarýshylyq, tehnıkalyq biliktilik qajet. Sondyqtan jumys eki negizgi baǵytta, ıaǵnı jalpy transfertter men Energetıka men kommýnaldyq sektordy jańǵyrtýǵa arnalǵan ulttyq joba aıasynda nesıelik qarajattar esebinen júrgiziletin bolady. Osy jylǵa jalpy transfertter aıasynda 128 mıllıard teńge, onyń ishinde sýmen jabdyqtaýǵa 78 mıllıard teńge, sý burýǵa — 50 mıllıard teńge bólindi. Óz kezeginde, mınıstrlik jobalardyń iske asyrylý barysyna turaqty negizde monıtorıng júrgizedi, — edi ol.
Vıtse-mınıstr Ulttyq joba aıasynda kommýnaldyq sektorǵa ártúrli qarjy kózderinen 1,9 trıllıon teńge tartý josparlanǵanyn atap ótti.
— Jobalardy keshendi josparlaý jáne baqylaý úshin Tehnıkalyq operator ınstıtýty engizildi. Onyń basty qyzmeti — tabıǵı monopolııa sýbektileriniń ótinimderin qaraý, jobalaý kezinde qazaqstandyq ónimge basymdyq berý, tehnıkalyq jáne tehnologııalyq sheshimderdi saraptaý men monıtorıng júrgizý. Alaıda, atalǵan ınstıtýt tapsyrys berýshiler men ákimdikterdiń fýnktsııalaryn qaıtalamaıdy, tehnıkalyq-tehnologııalyq sheshimderdiń sapasy men tıimdiligin qadaǵalaıtyn bolady, — dedi Qýandyq Qajkenov.
Sonymen qatar ol qarjylandyrý kózin anyqtaý jáne tarıfti kepildendirý úshin Qarjylyq operator ınstıtýty engizilgenin atap ótti.
— Qabyldanǵan sharalar jobalyq qatelikterdiń saldarynan týyndaıtyn shyǵyndar men merzimniń uzarýyn aldyn alýǵa múmkindik beredi. Jalpy Ulttyq joba aıasynda 2,8 myń shaqyrym sý burý jáne 5 myń shaqyrym sýmen jabdyqtaý jelileri, sonymen qatar 45 qalada káriz tazartý qurylystary jańartylady. Nátıjesinde 2030 jylǵa deıin sýmen jabdyqtaý jelileriniń tozý deńgeıin 33 paıyzǵa, sý burý jelilerin 41 paıyzǵa deıin tómendetý josparlanýda, — dedi vıtse-mınıstr.
Aıta keteıik, Úkimet otyrysynda sýmen jabdyqtaý jáne sý burý júıelerin damytý, tsıfrlandyrý men sý únemdeý tehnologııalaryn engizý sharalaryn talqyǵa salynyp jatyr.
