Kommýnaldyq sektordy jańǵyrtý: ulttyq jobany qarjylyndarý qalaı iske asyp jatyr
ASTANA. KAZINFORM — Jobalardy qarjylandyrýǵa ekinshi deńgeıli bankterdiń qatysýyn kúsheıtý kerek. Bul týraly «Energetıkalyq jáne kommýnaldyq sektorlardy jańǵyrtý» ulttyq jobasy iske asyrý barysyn talqylaý kezinde Ulttyq ekonomıka vıtse-mınıstri Asan Darbaev aıtty.
— 2025–2029 jyldarǵa arnalǵan jalpy ınvestıtsııa kólemi 11,7 trln teńgeni quraıdy. Onyń 7,97 trln teńgesi kommýnaldyq sektorǵa, al 3,85 trln teńge elektr energııasyn óndirý salasyna baǵyttalady. Bul qarajat 84 myń shaqyrym kommýnaldyq jelini jóndeýge jáne jańǵyrtýǵa, qýaty 7 309 MVt bolatyn jańa energetıkalyq nysandardy iske qosýǵa, sondaı-aq 15 jańa elektr óndirý nysanyn salýǵa jáne qoldanystaǵy 12 nysandy qaıta jańartýǵa jumsalady. Nátıjesinde, el boıynsha kommýnaldyq jelilerdiń ortasha tozý deńgeıi 40%-ǵa deıin tómendep, atalǵan nysandardaǵy apattar sany 25%-ǵa azaıady, — dedi Asan Darbaev atalǵan ulttyq jobany júzege asyrý jónindegi qoǵamdyq keńestiń otyrysynda.
Onyń aıtýynsha, ulttyq jobany júzege asyrý úshin jeke sektor, memleket jáne sheteldik kózderden resýrstar jumyldyryldy. 2026 jylǵy qarashadaǵy jaǵdaı boıynsha, ekinshi deńgeıdegi bankter 238 mlrd teńge bólýdi kózdese, halyqaralyq qarjy ınstıtýttary — EQDB, Dúnıejúzilik bank, AIIB, ADB jáne EXIM — 122,1 mlrd teńge qarajat usyndy.
— Jalpy alǵanda, kommertsııalyq bankter, halyqaralyq qarjy uıymdary jáne «Báıterek» holdıngi arqyly 951,5 mlrd teńgeden astam qarajat qarastyrylǵan. Munyń 60%-dan astamy «Báıterek» holdınginiń úlesine tıesili. Memlekettik damý ınstıtýttaryna túsetin júktemeni azaıtý úshin ekinshi deńgeıdegi bankter men halyqaralyq seriktesterdiń qatysýyn odan ári keńeıtý qajet, — dedi vıtse-mınıstr.
Buǵan deıin QR Premer-mınıstriniń orynbasary Qanat Bozymbaev óńirlerdegi kommýnaldyq jobalardy jedeldetýdi tapsyrǵanyn jazǵan edik.