Kommýnaldyq qyzmetter tarıfiniń ósýinen qashyp qutyla almaımyz — Sklıar

ASTANA. KAZINFORM — Kommýnaldyq qyzmetter tarıfi kóterilgenimen kúrt artý bolmaıdy. Bul týraly Úkimet úıinde ótken baspasóz máslıhatynda Premer-mınıstrdiń orynbasary Roman Sklıar aıtty.

— Barlyǵy da tarıfterdiń tómen bolǵanyn qalaıdy. Bul qalypty dúnıe, durys qalaý. Degenmen, ómir múldem ózgeshe talap etedi. Buǵan deıin jınaqtalǵan qorlarymyz ben resýrstarymyzdy is júzinde taýysqanymyzdy túsinýimiz qajet, — dedi ol agenttik tilshisiniń saýalyna oraı.

Osy rette birinshi vıtse-premer 2009-2017 jyldary energetıkalyq qýattardy damytý baǵdarlamasy júzege asyrylǵanyn, sol kezeńde energııa óndiretin nysnadardyń tozý deńgeıi aıtarlyqtaı qysqarǵanyn atap ótti.

— Sodan soń 2018 jyldan bastap uzaq ýaqyt boıy túrli ilespe qyzmetterdiń, otynnyń baǵasy óskenine qaramastan elektr energııasy qunyn kótermedik desek te bolady. Bul 37 JEO-nyń 20-synyń qyzyl aımaqqa tap bolýyna alyp keldi. Shynaıy qater tóndi. Olar qystyń ortasynda toqtap, jylý bere almaı qalýy múmkin edi. Munan ary bul jaǵdaıǵa tózýge bolmaıdy. Biz bıýdjettiń atalǵan stansalardy jańǵyrtýǵa qandaı da bir qarajat bóletindeı jaǵdaı emes ekendigin, jalpy bólmeýi tıistigin naqty túsýnimiz qajet. Sondyqtan tarıfterdiń ósiminen jaltara almaımyz. Biraq, ol birtindep ósim bolady. Biz esh ýaqytta da onyń kúrt artýyna jol bermeımiz. Ol birtindep kóteriledi. Sonymen qatar atalǵan kommýnaldyq qyzmetter úshin belgili bir sýbsıdııa alý tıis ári quqyly halyqtyń áleýmettik osal tobymen jumys isteıtin bolamyz, — dedi Roman Sklıar.

Buǵan deıin kommýnaldyq qyzmetter úshin biryńǵaı túbirtek engiziletinin jazǵan edik.