Kommertsııalandyrylǵan jobalardyń 27%-y ǵana turaqty ónim satýdy qamtamasyz etti — Smaıylov
ASTANA. KAZINFORM — Kommertsııalandyrýdyń qoldanystaǵy modeli ǵylymı nátıjeniń turaqty ónimge aınalýyn qamtamasyz etpeı otyr. Bul týraly Quryltaı otyrysynda Joǵary aýdıtorlyq palata tóraǵasy Álıhan Smaıylov aıtty.
— Kommertsııalandyrý ǵylymı nátıjelerdiń naryqqa turaqty shyǵýyn qamtamasyz etpeıdi. Kommertsııalandyrý ǵylymı tsıkldyń álsiz býyny bolyp otyr. Ǵylym qorynyń málimeti boıynsha jobalardy kommertsııalandyrý kórsetkishi — 44 paıyz. Sonymen birge esepti jyly obektıvti salystyrmaly esepteý kezinde onyń 16 paıyz ǵana ekendigi anyqtaldy, — dedi Álıhan Smaıylov.
Onyń aıtýynsha, jobalardyń naqty naryqtyq áseri de shamaly. Aıaqtalǵan 141 jobanyń tek 38-i nemese 27 paıyzy ǵana sońǵy úsh jylda turaqty ónim satýdy qamtamasyz etken. Al somasy 22 mıllıard teńgeni quraıtyn qalǵan 103 joba ónim shyǵarý jáne satý kólemi boıynsha kútken nátıjelerge qol jetkize almaǵan.
— Kóptegen joba boıynsha kommertsııalyq nátıjeler olardyń oryndalý merzimderin uzartýmen aýystyrylady. Osylaı 46 jobanyń oryndalý merzimi uzartyldy. Nátıjesinde kommertsııalandyrýdyń qoldanystaǵy modeli ǵylymı nátıjeniń turaqty ónimge aınalýyn, onyń satylýyn jáne ekonomıkalyq qaıtarymyn qamtamasyz etpeı otyr, — dedi palata tóraǵasy.
Aıta keteıik, baǵdarlamalyq-nysanaly qarjylandyrýdyń 18 jobasy boıynsha 56 patent jobalardy iske asyrýǵa qatyspaǵan uıymdarǵa tıesili bolǵan.
