Kommertsııalyq maqsatta sańyraýqulaq pen jıdek tergender salyq tóleıdi

ASTANA. QazAqparat - QR Premer-Mınıstriniń orynbasary – Qarjy mınıstri Erulan Jamaýbaev sańyraýqulaq pen jemis-jıdek teretinderge salyq salýdyń jańa normasyna qatysty túsinik berdi, dep habarlaıdy QazAqparat tilshisi.

«Mundaı alym túri buryn da bolǵan. Osyǵan deıin buryn osy talap tek erekshe qorǵalatyn aımaqtarda, ıaǵnı ulttyq park, qoryqtardyń aýmaǵynda taralǵan edi. Al endi barlyq jerde qoldanylmaq. Ekinshiden, jańa normanyń qarapaıym halyqqa qatysy joq. Bul turǵyda salyq ónimdi kóp kólemde jınaıtyn, dárilik preparattar jasaıtyn nemese kommertsııalyq maqsatta paıdalanatyn kásipkerlerge qatysty», - dedi E. Jamaýbaev Májiliste tilshiler suraǵyna jaýap bere otyryp.

Osy oraıda tilshiler «kópbalaly otbasylar balalaryna kıim alý maqsatynda jıdek terip, ony satqan jaǵdaıda, salyq salyna ma?» dep surady.

«Bul jaǵdaılarda salyq salynbaıdy. Ony qarapaıym halyq tólemeıdi», - dep naqtylady mınıstr.

Atap aıtqanda, 2024 jyldan bastap elimizde sańyraýqulaq pen jıdek tergeni úshin keıbir azamattarǵa salyq qarastyrylǵan.