Komıtet jeke tulǵalardyń kólik jáne múlik salyqtaryndaǵy ózgeristerge túsinik berdi
«Memleket basshysy «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksin (Salyq kodeksi) qoldanysqa engizý týraly» Qazaqstan Respýblıkasynyń Zańyna qol qoıdy. Osy zańǵa sáıkes jeke tulǵalardyń kólik, jer jáne múlik salyqtaryn tóleý bóliginde ózgerister engizildi», - delingen Qarjy mınıstrligi Memlekettik kirister komıteti málimetinde.
Jeke tulǵalardyń salyq mindettemelerin durys esepteý jáne kólik quraldaryn ıelenýdiń naqty merziminiń ózgerýine baılanysty artyq tólemniń paıda bolýyn boldyrmaý, kólik quraldaryna qate tólengen salyqty qaıtarýǵa baılanysty áýre-sarsańǵa saldyrmaý maqsatynda jeke tulǵalardyń kólik quraldaryna salynatyn salyqty tóleý merzimi esepti jyldan keıingi jyldyń I-toqsanynyń sońyna aýystyrylady.
Bul norma turaqty bolyp tabylady. Zańda osy normanyń 2020 jyldan bastap qoldanylýy, ıaǵnı 2020 jylǵy mindettemeler boıynsha 2021 jyly tólem júrgizý kózdelgen.
Sondaı-aq jeke tulǵalardyń múlik jáne jer salyqtaryn biriktirý eskerilgen.
«Atalǵan salyqtardy biriktirý salyq elementterin (salyq salý obektisi, salyq bazasy, mólsherlemeler, esepteý jáne tóleý tártibi) ózgertpeı júzege asady. Bul jaǵdaıda jer ýchaskeleri men múlik boıynsha salyq qoldanystaǵy tártipke sáıkes jeke-jeke esepteledi. Bul rette salyq tóleýshige tólenýge tıis soma bir bıýdjettik synyptama kodymen usynylady.
Osylaısha, bul norma jeke tulǵalar úshin tóleý tártibin jeńildetedi. Zańda bul normany 2020 jyldan bastap engizý kózdelgen, ıaǵnı 2021 jyly 2020 jylǵy mindettemeler boıynsha múlik pen jerge biriktirilgen salyqty tóleý kózdelip otyr», - dep atap ótilgen komıtet habarlamasynda.
Kóppáterli turǵyn úılerdiń menshik ıeleri úshin jer salyǵyn joıý qarastyrylǵan.
Kóppáterli turǵyn úılerdegi páterler ornalasqan jer salyǵyn tóleýden bosatý týraly norma ákimshilendirýdiń kúrdeli bolýyna jáne osy salyqty esepteý men jınaýǵa jumsalatyn shyǵyndardyń ózin aqtalmaýyna baılanysty.
«Osylaısha, kez kelgen salyq salý, eń aldymen, «salyq» túsiminiń ákimshilik shyǵyndardan edáýir joǵarý bolýy kerek, salyqtyq ákimshilendirý arzan bolýy kerek degen qaǵıdaǵa basshylyqqa alynǵan. Zańda bul normany engizý 2020 jyldan bastap kózdelgen, ıaǵnı 2020 jyly osy jer ýchaskeleri úshin jer salyǵy tólenbeıtin bolady. Bul norma jeke tulǵalar úshin salyq aýyrtpashylyǵyn jeńildetýge baǵyttalǵan», - dep atalyp ótken vedomstvo málimetinde.
