Komıtet tóraǵasy S. Áıimbetov: «Zań jobasy elektr óndirýshi men tutynýshy talabynan shyǵatyndaı bolyp jasalýy kerek»

ASTANA. 22 qyrkúıek. QazAqparat. Búgin 22 qyrkúıekte Qazaqstan Respýblıkasy Parlamenti Májilisiniń Ekonomıkalyq reforma jáne óńirlik damý komıtetiniń uıymdastyrýymen «QR keıbir zańnamalyq aktilerine elektr energetıkasy, tabıǵı monopolııalar men retteletin naryq sýbektileriniń ınvestıtsııalyq qyzmeti máseleleri boıynsha tolyqtyrýlar men ózgerister engizý týraly» zań jobasy boıynsha dóńgelek ústel ótti.

«Memleket Basshysy N.Nazarbaev Parlamenttiń besinshi sessııasynyń ashylýynda bizge 4 toptamadan turatyn zańshyǵarýshylyq tapsyrma bergen bolatyn. Sonyń birinshi tobynda ınvestıtsııalyq múmkindikterdi arttyratyn salaǵa qatysty zańdar jasap berýimiz tapsyrylǵan. Prezıdent energetıkany damytý el Táýelsizdigin bekemdeý ekenin atap ótken edi. Sondyqtan osy zań jobasy Májilis qorjynyna kelip túsip, búgingi dóńgelek ústelde qaralyp otyr. Ol eldegi eń mańyzdy sharýa - elektr qýaty men ınvestıtsııalyq salany rynokta retteý bolyp tabylady. Zań jobasynyń tanystyrylymy ótkizilip, jumys tobynyń otyrystarynda talqylandy. Oǵan depýtattar tarapynan 127 tolyqtyrý tústi. Búgin ony jan-jaqty taǵy bir talqylap, óndirýshi men tutynýshy talabynan shyǵatyndaı etip jasaýymyz kerek»,- dep basqosýdy Komıtet tóraǵasy Seıtsultan Áıimbetov betashar sózben ashty. Zań jobasy boıynsha jumys tobynyń jetekshisi Valerıı Doskalov dóńgelek ústeldi júrgizip otyrdy.

Zań jobasy jaıynda Tabıǵı monopolııalardy retteý boıynsha agenttik tóraǵasy Nurlan Aldabergenov pen QR ındýstrııa jáne jańa tehnologııalar vıtse-mınıstri Baqytjan Jaqsalıev baıandama jasady.

Atalǵan zań jobasynyń maqsaty - elektr stantsııalardyń ınvestıtsııalyq qyzmetiniń ashyqtyǵyn arttyrý men ınvestıtsııalyq mindettemeleri kóleminiń tarıftik tabys deńgeıine sáıkestigin qamtamasyz etý jáne Qazaqstan ekonomıkasynyń elektr energııasy men qýatyna qajettiligin qýat naryǵyn engizý esebinen qamtamasyz etý bolyp tabylady.

Zań jobasy 2010 jylǵy 22 qańtarda ótken keńeste Memleket basshysy bergen tapsyrmalardy oryndaý úshin ázirlendi. «Tabıǵı monopolııalar jáne retteletin naryqtar týraly» jáne «Elektr energetıkasy týraly» zańdar men Ákimshilik quqyq buzýshylyq týraly QR Kodeksine tolyqtyrýlar men ózgerister engizýdi kózdeıdi.

Dóńgelek ústelde «KEGOC» AQ materıaldyq tehnıkamen qamtamasyz etý jáne júıelik qyzmet boıynsha atqarýshy dırektory Valerıı Lı, «Qazaqstannyń ındýstrııany damytý ınstıtýty» AQ elektroenergetıkany damytý ortalyǵynyń dırektory Ánýar Túkenov, «Energoprom» Qazaqstandyq ǵylymı-zertteý ınstıtýty AQ Prezıdenti Gennadıı Andreev, USAID-tiń elektroenergetıkalyq rynoktar baǵdarlamasy boıynsha keńesshisi Bekker Maıkl qosymsha baıandamalar jasady.

Zań jobasyn depýtattar qyzý talqylap, óz oılaryn ortaǵa saldy.