Komıtet «Faýna Eır» áýe kompanııasynyń qyzmetin toqtatty
ASTANA. QazAqparat - QR IDM Azamattyq avıatsııa komıteti shaǵyn avıatsııadaǵy ushý qaýipsizdigin qamtamasyz etý jumystaryn jalǵastyrýda, dep habarlaıdy QazAqparat QR IDM silteme jasap.
Komıtet ınspektorlarynyń tekserýi kezinde «Faýna Eır» áýe kompanııasynyń Qazaqstandaǵy azamattyq áýe kemeleriniń paıdalanýshylaryna qoıylatyn sertıfıkatsııalyq talaptardy buzǵany anyqtalǵan.
«Ushý qaýipsizdigin qamtamasyz etpegeni úshin QR IDM Azamattyq avıatsııa komıteti 2018 jyldyń 8 qazanynan bastap «Faýna Eır» JShS-niń avıatsııalyq jumystarǵa berilgen kýálikti paıdalanýǵa shekteý qoıdy», - delingen Azamattyq avıatsııa komıtetiniń Feısbýk paraqshasyndaǵy habarlamada.
Buǵan deıin Azamattyq avıatsııa komıteti QR Bas kólik prokýratýrasymen birlesip júrgizgen jumystyń nátıjesinde 17 ushaqtyń jáne shaǵyn avıatsııanyń 2 áýe kompanııasynyń (Azııa Kontınental Avıalaıns jáne «KAZAVIA» táýelsiz áýe kompanııasy» JShS) qyzmeti ýaqytsha toqtatylǵan bolatyn. Sondaı-aq, reıstiń jáne tehnıkalyq jumystardyń sapasyz uıymdastyrylýyna baılanysty 16 áýe kompanııanyń laýazymdy tulǵalaryna qatysty tártiptik sharalar qabyldanǵan.
