Komıssııa jańa Konstıtýtsııa týraly usynystardyń qalaı eskerilgeni týraly esep beredi

ASTANA. KAZINFORM — Konstıtýtsııalyq komıssııa tóraǵasy Elvıra Ázimova Ata zańnyń jańa redaktsııasy týraly azamattardan túsken usynystardyń taǵdyry ne bolǵanyn jıyntyq keste arqyly halyqqa jetkizýdi tapsyrdy.

— Konstıtýtsııalyq komıssııanyń atyna azamattardan oń pikirler áli de kelip jatyr. Sonymen qatar, komıssııa músheleri jańa Konstıtýtsııa jobasynyń jekelegen normasyn naqtylap redaktsııalaý týraly usynystar aıtty. Osyǵan baılanysty kelip túsken usynystardy taldaý jumystary jalǵasady, — dedi ol.

Konstıtýtsııalyq sot tóraǵasy óziniń orynbasary Baqyt Nurmuhanovqa komıssııanyń 8 otyrysy kezinde túsken usynystardy bir kestege jınaqtaýdy tapsyrdy.

— Baqyt Maratuly, kelesi otyrysta osy 8 otyrystyń ishinde kelgen usynystardyń bárin jınap, jıyntyq kestege salyp, árbir usynys jobada qalaı eskerilgenin, qaısysy eskerý protsesinde ekenin, osynyń bárin kórsetseńiz. Sebebi bizdiń otyrystar tikeleı efırde kórsetilip jatyr. Bizge ǵana emes, azamattarǵa da osy jumys boıynsha anyq jáne naqty aqparat berilý kerek, — degen Elvıra Ázimova Konstıtýtsııalyq komıssııanyń toǵyzynshy otyrysy 7 aqpanǵa belgilengeni, naqty ýaqyty qosymsha habarlanatynyn aıtty.

Aıta keteıik, jańa Konstıtýtsııanyń jobasyn túrli mekemeler, ujymdar talqylap jatyr.