Komıssııa otyrysynda Joǵarǵy Sottyń 4 sýdıasynyń qyzmetin qaıta qalpyna keltirý máselesi kóterildi
ASTANA. 15 qarasha. QazAqparat /Rýslan Ǵabbasov/ - Búgin QR Prezıdenti janyndaǵy Adam quqyqtary jónindegi komıssııanyń keńeıtilgen otyrysynda Joǵarǵy Sottyń 4 sýdıasynyń qyzmetin qaıta qalpyna keltirý máselesi kóterildi. Bul týraly búgin atalǵan komıssııa otyrysy barysynda jýrnalısterdiń saýalyna jaýap berý kezinde Joǵarǵy Sottyń sýdıasy Ábdirashıd Júkenov aıtty.
Búgin komıssııa otyrysynda Joǵarǵy Sottyń 4 sýdıasynyń máselesi sóz boldy. Olardyń is-áreketterinde qylmystyq quram bolmaǵandyqtan qylmystyq is qozǵalmaǵany buǵan deıin habarlanǵan bolatyn.
Jalpy búginge deıin olardyń qyzmetine oralýyna baılanysty eshqandaı sheshim qabyldanbaǵanyna toqtalǵan Á. Júkenov, «búgin kommısııa músheleri atalǵan sýdıalardy óz ornyna, ıaǵnı qyzmetin qalpyna keltirý jóninde másele kóterip jatyr. Bul másele endi qalaı sheshiletinin qazir aıta almaımyn»,-dedi.
Esterińizge sala keteıik, bıylǵy 14 sáýirde QR Parlamenti Senatynyń jalpy otyrysynda Ekonomıkalyq qylmysqa jáne sybaılas jemqorlyqqa qarsy kúres agenttiginiń Memleket basshysynyń atyna jasaǵan usynysy boıynsha QR Joǵarǵy sotynyń 6 sýdıasy qyzmetterinen bosatylǵan bolatyn.
Atap aıtqanda, Ekonomıkalyq qylmysqa jáne sybaılas jemqorlyqqa qarsy kúres agenttigi QR Prezıdentiniń atyna birqatar sýdıalardy QR Joǵarǵy sotynyń sýdıasy qyzmetinen bosatý týraly usynys jasady. Olar: Almaz Táshenova, Maqsat Ábilqaıyr, Márzııa Baltabaı, Saılaýbek Jákishev, sondaı-aq Baqytjan Jaqypov pen Marklen Qamnazarovtar.
