Komıssııa Almaty mańynda apatqa ushyraǵan CRJ-200 ushaǵyndaǵy «qara jáshiktiń» málimetterin taldaýǵa kiristi
ASTANA. 7 aqpan. QazAqparat - Halyqaralyq avıatsııalyq komıtet mamandary «qara jáshikti» bir aptanyń ishinde zerttep shyqty, dep habarlady Kólik jáne kommýnıkatsııa mınıstrliginiń baspasóz qyzmeti.
Alynǵan málimetter apattyń sebebin tekserýmen aınalysatyn Komıssııanyń qaraýyna berildi.
Komıssııa tóraǵasy, Kólik jáne kommýnıkatsııa vıtse-mınıstri Azat Bekturovtyń aıtýynsha, «qara jáshikti» taldaýdy aıaqtaý ushaq apatynyń sebebin naqty anyqtaý degen sóz emes. Qazir komıssııa apattyń yqtımal sebepteri boıynsha taldaý jumystaryn júrgizýde».
Taldaý jumystarynyń aıasynda sarapshylar paıdalaný erejeleriniń oryndalýyn, ushaqqa, dvıgatelderge, avıatsııalyq jáne radıoelektrondyq jabdyqtarǵa, júıeler men agregattarǵa júrgizilgen tehnıkalyq qyzmetter men jóndeý jumystaryn baǵalaıdy, ekıpajdyń, ushý saparyn qamtamasyz etýshi jerdegi qyzmetterdiń daıyndyqtary men is-qımyldaryn, aýa raıynyń jaǵdaıyn, jerdegi radıotehnıkalyq quraldardyń jumystaryn zertteıdi.
Bul tekserýlerdi júrgizýge Halyqaralyq avıatsııalyq komıtettiń, ushaqty jasap shyǵarǵan zaýyttyń, dvıgatelderdi jasaýshy zaýyt pen ushaqqa tehnıkalyq qyzmet kórsetýshi zaýyttyń ókilderi tartylyp otyr.
«Qara jáshikte» tirkelgen málimetterdi oqýdyń nátıjeleri qosymsha taldaý jumystary úshin Kanadanyń Kólik qaýipsizdigi keńesine de joldanady.
Tekserý amaldary aıaqtalǵannan keıin Komıssııa resmı málimdeme jasaıdy.
Anyqtama úshin: Erevanda bolǵan CRJ-200 ushaǵynyń apaty 1,5 jyl, al Indonezııadaǵy SuperJet-100 ushaǵynyń apaty 9 aı boıy zerttelgen bolatyn.
