«Komıssar Júrgenov» romany alty tilge aýdarylady
«Almatydaǵy Abaı atyndaǵy Memlekettik akademııalyq opera jáne balet teatrynda ótken Temirbek Júrgenovtiń 125 jyldyǵyna arnalǵan saltanatty is-sharaǵa qatystym. Oǵan shyǵarmashylyq zııaly qaýymnyń kórnekti ókilderi, sondaı-aq TÚRKSOI halyqaralyq túrki mádenıeti uıymynyń qonaqtary keldi. Atap aıtqanda, Bas hatshynyń orynbasary Bılal Chakyjy qatysty.
Іs-shara jazýshy Beıbit Qoıshybaevtyń «Komıssar Júrgenov» atty jańa kitabynyń tusaýkeserinen bastaldy. Aıtpaqshy, kórnekti memleket qaıratkerine arnalǵan bul roman alty tilge aýdarylyp, basqa túrki elderinde de basylyp shyǵady», - dep jazdy mınıstr.
Sondaı-aq, Temirbek Júrgenov atyndaǵy Qazaq ulttyq óner akademııasynyń stýdentteriniń qatysýymen kontsert ótip, tarıhı tulǵanyń ómiri men qyzmeti týraly baıandaıtyn teatraldy, mýzykalyq jáne bı qoıylymdary kórsetilgen. Jıynnyń ashylý saltanatynda mınıstr Prezıdent Qasym-Jomart Toqaevtyń quttyqtaý hatyn oqyp berdi.
Abaı atyndaǵy teatr ǵımaratynda mereıtoı ıesine arnalǵan kartınalar men músinder kórmesi de ótti.
«Árıne, bul biz atap ótken mańyzdy kúnge oraılastyrylǵan jalǵyz is-shara emes. Memleket basshysynyń tapsyrmasy boıynsha jyl boıy elimizdiń barlyq aımaǵynda 100-den astam túrli is-shara ótedi. Temirbek Júrgenovtiń mereıtoıy – basqa túrkitildes elderde de atalyp ótetin halyqaralyq aýqymdaǵy oqıǵa», - deıdi mınıstr.
Eske salsaq, 2023 jyl túrki áleminde Temirbek Júrgenov jyly bolyp jarııalanǵan.
