Kómirtegi beıtaraptylyǵy parnıkti gaz shyǵaryndylaryn barynsha tómendetýge baǵyttalǵan - sarapshy

NUR-SULTAN. QazAqparat – Kómirtegi beıtaraptylyǵy parnıkti gaz shyǵaryndylaryn barynsha tómendetýge baǵyttalǵan. Mundaı pikirdi QR EGTRM Klımattyq saıasat jáne jasyl tehnologııalar departamenti dırektorynyń orynbasary Aınur Kópbaeva bildirdi, dep habarlaıdy QazAqparat tilshisi.

«Búkil álemdik qoǵamdastyq, onyń ishinde Qazaqstan Úkimeti de klımattyń ózgerýimen kúreske baǵyttalǵan saıasatty belsendi túrde júrgizip jatyr. Klımattyń ózgerýine qatysty máseleniń shegi de, shekarasy da joq ekendigin jaqsy bilemiz. Buǵan qosa, jahandyq temperatýrany ustap turý, klımattyń ózgerýi jónindegi halyqaralyq sarapshylar dabyl qaǵyp júrgen qorqynyshty jaǵdaıǵa tap bolmaýymyz úshin parnıktik gazdardyń jahandyq shyǵaryndylaryn qysqartý óte mańyzdy. Osy maqsatta Qazaqstan qarqyndy jumys júrgizip jatyr. Klımattyń ózgerýine barynsha beıimdelý maqsatynda ekologııalyq zańnamamyzǵa jáne Sý, Jer kodeksterimizge túzetýler men ózgertýler engizýdemiz», - dedi ol.

Sonymen qatar departament dırektorynyń orynbasary Qazaqstan parnıkti gaz shyǵaryndylaryn tómendetýge qatysty jaýapkershilikti tereń sezine otyryp, Parıj kelisimindegi maqsattarǵa qol jetkizý úshin elimizdiń kómirtegi beıtaraptylyǵy doktrınasynyń jobasyn qabyldaǵanyn atap ótti.

«Kómirtegi beıtaraptylyǵy ekonomıkanyń kómirtegin kóp shyǵaratyn sektorlarynda parnıkti gaz shyǵaryndylaryn barynsha tómendetýge baǵyttalǵan. Ol úshin ártúrli tetik ázirlep jatyrmyz. Máselen, qazir parnıktik gaz shyǵaryndylaryn saýdalaý júıesin jetildirý baǵytynda jumys isteýdemiz», - dedi Aınur Kópbaeva.